Qazaqstan qarjygerleri qaýymdastyǵynyń málimetine súıensek, 2023 jylǵy qyrkúıek aıynyń aıaǵynda bankterdiń nesıe portfeliniń jalpy mólsheri 27,7 trln teńgege jetken.
Toǵyz aıdyń ishinde ósim kórsetkishi - 14,2 paıyz. Kredıttik sektorda bólshek nesıe portfeli (jeke tulǵalarǵa berilgen nesıeler) baıaý óse bastaǵany baıqalǵan, dep habarlaıdy almaty-akshamy.kz.
Byltyr bul kórsetkish 21,5 paıyzǵa teń bolsa, bıyl 18,5 paıyz ǵana bolǵan. Oǵan qosa qaryz alýshylardyń sany azaıǵan – byltyr 373,3 myń adam nesıe rásimdese, bıyl tek 327,6 myń adam nesıe alǵan. Ásirese ıpoteka alý kórsetkishi kúrt azaıǵany baıqalady. Byltyr ósim 28,8 paıyz bolsa, bıyl, ıaǵnı 2023 jyly 9,9 paıyzǵa deıin tómendegen.
Sarapshylardyń aıtýynsha, óz kezeginde bul tutynýshylyq nesıelendirý kórsetkishine keri áser etedi – 2022 jylǵy qarjylyq turaqtylyq esebi boıynsha, Qazaqstanda ıpoteka alýshylardyń jartysynan kóbi aldaǵy 3 aıda tutynýshylyq nesıe alady. Aıta keteıik, ıpotekalyq nesıe naryǵyndaǵy suranystyń tómendeýi áýeli jeńildikter qarastyrylǵan baǵdarlamalardy, onyń ishinde "7-20-25" baǵdarlamasyn qarjylandyrýdyń shektelýimen baılanysty. 2023 jyly bul baǵdarlamaǵa bólingen qarjy mólsheri nebári 100 mlrd teńge bolǵan edi, ıaǵnı ár toqsanǵa 25 mlrd teńge bólingen. Osylaısha naryqtyq ıpotekaǵa suranys birte-birte artyp keledi – byltyr 10 ıpotekanyń toǵyzynda jeńildikter qarastyrylsa, búginde barlyq nesıeniń shamamen 25 paıyzy naryqtyq shart boıynsha berilip jatyr.