Qazaqstan polısıasynyń birneshe býynyna ustaz bolǵan ańyz adam
1 qazan – halyqaralyq qarttar kúni merekesi qarsańynda Almaty qalasyndaǵy «Qazaqstan» sanatorııinde İİM Almaty akademıasy basshylyǵynyń qoldaýymen general Maqan Esbolatov atyndaǵy kitaphana ashyldy, dep habarlaıdy Almaty-akshamy.kz.
Kitaphananyń ashylý saltanatyna Almaty qalasy Polısıa departamentiniń bastyǵy jáne «Generaldar keńesiniń» músheleri qatysty.
M.Esbolatov atyndaǵy kitaphananyń lentasyn Almaty qalasy Polısıa departamentiniń bastyǵy polısıa general-maıory A. Zapparov pen «Qazaqstan sanatorııi» aksıonerlik qoǵamynyń tóraǵasy general-leıtenant B.Sársekov, Almaty Akademıasynyń bastyǵy polkovnık A.Saıtbekov qıdy.
Almaty qalasy PD bastyǵy A.Zapparov pen «Qazaqstan sanatorııi» AQ tóraǵasy B.Sarsekov quttyqtaý sóz sóıledi.
PD bastyǵy kitaphana qoryna QR İshki ister mınıstri polısıa general-leıtenanty M.Ahmetjanovtyń atynan «Táýelsiz Qazaqstannyń ishki ister organdarynyń tarıhı joly» atty kitapty tartý etti.
«Búgingi ótip jatqan is-shara biz úshin úlken qýanysh. İshki ister mınıstrliginiń eńbek sińirgen qyzmetkeri, general-maıor Maqan Esbolatov – Qazaqstan polısıasynyń birneshe býynyna ustaz bolǵan ańyz adam. Qarapaıym kýrsanttan ishki ister mınıstrine deıingi joldan ótken Maqan Esbolatovtyń eńbek jolynyń jarqyn betteri – búgingi polısıa qyzmetkerlerine ónege.
Sondyqtan da İshki ister mınıstrliginiń ózindik tarıhy bar «Qazaqstan» sanatorııinde general-maıor Maqan Esbolatov atyndaǵy kitaphananyń ashylýy bizdiń akademıa úshin zor mártebe»,-dedi saltanatty jıynda sóz sóılegen M.Esbolatov atyndaǵy Almaty akademıasynyń bastyǵy polısıa polkovnıgi A.Saıtbekov óz atynan kitaphana qoryna general M.Esbolatovtyń eńbek joly týraly jaryq kórgen kitaptar tartý etti.