BAQ qyzmetkerleri kúnine oraı polısıa vedomstvosynda ishki ister organdarynyń baspasóz qyzmeti men medıa-ortalyǵynyń qyzmetkerleri marapattaldy, – dep habarlaıdy Almaty-akshamy.kz Polisia.kz-ke siltime jasap.
Sharaǵa aqparat jáne qoǵamdyq damý mınıstri Darhan Qydyráli men táýelsiz Qazaqstanda jaryqqa shyqqan «Saqshy» gazetiniń birinshi bas redaktory marqum Bazarbaı Isaevtyń jary Qulan Ysqaqova qatysty. Sondaı-aq kezdesýge onlaın-formatta aýmaqtyq polısıa bólinisteriniń bastyqtary men óńirlik baspasóz qyzmetteriniń jetekshileri qosyldy.
– Qaýipsizdik kepili – polısıa týraly jazyp, kórsetip, qyzmetkerlerdiń eren eńbegin jurtqa pash etip júrgen baspasóz qyzmetiniń ornyn erekshe atap ótken jón. Aımaqtaǵy jańalyqtarmen bólisip, vedomstvonyń ashyqtyǵyn dáriptep kele jatqan qanshama mamandar bar. Tártip saqshylarynyń ımıjin qalyptastyratyn da solar. Polısıa bólinisteriniń baspasóz hatshylarymen etene jaqyn jumys istep, ishki ister organdarynyń bedelin arttyrýǵa úles qosyp júrgen medıa-ortalyq ujymyn da atap ótkim keledi, – dedi Marat Ahmetjanov.
Aqparat jáne qoǵamdyq damý mınıstri Darhan Qydyráli İİM baspasóz qyzmetine aqparat berýdegi jedeldigi men kásibıligi úshin alǵysyn bildirdi. İs-shara barysynda aqparattyq salada jumys isteıtin birqatar qyzmetker “Aqparat salasynyń úzdigi” tósbelgisimen, gramotalarmen jáne alǵys hattarmen marapattaldy.
– Qazaqtyń qoǵam qaıratkeri Mirjaqyp Dýlatov aıtqandaı: «Qaı eldiń baspasózi myqty bolsa, sol eldiń ózi de myqty». Barshańyzdy kásibı merekemen shyn júrekten quttyqtaımyn! Osyndaǵy árbirińizge shyǵarmashylyq shabyt, tolaǵaı tabys tileımin! – dedi İİM basshysy.
Jıyn sońynda Marat Ahmetjanov merekege oraı Darhan Qydyrálige «Quqyq tártibin qamtamasyz etýge qosqan úlesi úshin» medalin tabystap, «Sert» detektıv shyǵarmalar jınaǵyn syıǵa tartty. Aıta keteıik, ishki ister organdarynyń jumysy týraly baıandaıtyn «Saqshy» jáne «Na straje» gazetterine bıyl 90 jyl.