Qazaq halqynyń san ǵasyrlyq armany bolǵan qasıetti táýelsizdigimizge qater tóndirgen qańtar oqıǵasyna jýyrda bir jyl bolady.
Sol bir qasiretti kúnder Qazaqstan polısıasynyń da kúsh-jigerin synǵa salǵan kúnder boldy.
El tynyshtyǵy úshin sapta turǵan tártip saqshylary syn saǵatta anttaryna adaldyq tanytyp, Otanǵa degen súıispenshiligin ózderiniń batyl da erjúrek is-áreketterimen dáleldeı bildi.
Elimiz Táýelsizdik alǵan 30 jyldyń ishinde 800-den astam polısıa qyzmetkeri qyzmet babynda jáne qylmyskerlerdiń qolynan qaza tapsa, qańtar oqıǵasy osy bir qaraly sandy taǵy da eseleı tústi.
Almaty qalasynda «Taǵzym» memorıalynyń ashylýy bizdiń el basyna kún týǵan aýyr kúnderde qaza tapqan áriptesterimizge degen úlken qurmet dep bilemiz. Memorıaldyń ashylý saltanatynda Memleket basshysy Qasym-Jomart Toqaev: «Qańtar qasireti men sol kezde ómiri qıylǵan azamattar jadymyzda máńgi saqtalady», - degen bolatyn. Iá, qańtar oqıǵasy kezinde quqyq qorǵaý organdarynyń 3 myńnan astam qyzmetkeri jaralanyp, 19 adam qaza tapty. Qanshama áriptesimiz múgedek bolyp qaldy.
Osy aýyr kúnderde Almaty akademıasynyń jeke quramy da el qaýipsizdigi úshin sapqa turdy. Qańtar oqıǵasy kezinde batyldyq tanytyp, beıbit turǵyndardy qorǵaǵan taktıka-arnaýly daıarlyq kafedrasynyń bastyǵy, polısıa polkovnıgi Oleg Romanovıch Soı Memleket basshysynyń qolynan «Erligi úshin» medalin aldy.
«Taǵzym» memorıaly - jáı eskertkish qana emes, ol, Memleket basshysy aıtqandaı, turaqtylyq pen tatýlyq bolsa ǵana elimizdiń amandyǵyn, jerimizdiń bútindigin qorǵaı alatynymyzdy dáleldeıtin memorıal.