Búgingi tańda esimderi belgili qazaqstandyq soldattardyń jalpy sany – 74.
SİM baspasóz qyzmetiniń aqparatyna sáıkes, Qazaqstannyń Oslodaǵy Elshiligi Ekinshi dúnıejúzilik soǵys kezinde okýpasıada bolǵan Norvegıada tutqynda qaza tapqan qazaqstandyq jaýyngerlerdiń jańartylǵan tizimin jarıalady, dep habarlaıdy Almaty-akshamy.kz
Sońǵy aılarda 18 qazaqstandyq sarbazdyń aty-jóni men jerlengen jeri anyqtalǵan. Búgingi tańda esimderi belgili qazaqstandyq soldattardyń jalpy sany – 74. Sarbazdar Almaty qalasy, Aqmola, Aqtóbe, Almaty, Jambyl, Qyzylorda, Soltústik Qazaqstan, Túrkistan jáne Shyǵys Qazaqstan oblystarynyń týmalary nemese sol óńirlerden áskerge shaqyrylǵan. Jaýyngerlerdiń beıitteri Sanneshoen (Tjøtta sovjetiske krigskirkegård), Lıllehammer (Jørstadmoen), Bergen (Åsane kirkegård) jáne Tronheım (Støren kirkegård) qalalarynyń janyndaǵy keńestik áskerı zırattarda.
«Tizimde sarbazdyń týǵan jyly men mekeni, áskerge shaqyrý, qyzmet etý, tutqyndalýy, qaıtys bolǵan kezi jáne jerlengen jeri, týystary týraly málimetter, sondaı-aq qolda bar qujattarǵa siltemeler berilgen. Tizim «Falstad ortalyǵy» (Norvegıa), Qazaqstan aýmaǵynan shaqyrylyp Uly Otan soǵysy kezinde qaza tapqan nemese habarsyz ketken áskerı qyzmetshiler týraly «Memorıal» derekter banki, sondaı-aq Reseılik «Memorıal» jıyntyq derekter banki sıaqty birneshe derekter kózderinen alynǵan aqparatty salystyrý arqyly jasaldy», - dep jazylǵan habarlamada.
Búgingi kúnge deıin Norvegıada jerlengen keńestik áskerılerdiń shamamen 15 500 sany týraly belgili bolyp, olardyń 7000-ǵa jýyǵynyń esimderi anyqtalǵan. 1941-1945 jyldary Norvegıada jerlengen qazaqstandyq jaýyngerlerdiń tizimin (2022 jylǵy sáýirdegi jaǵdaı boıynsha) elshiliktiń saıtynan bilýge bolady.