Abaı atyndaǵy Qazaq ulttyq opera jáne balet teatrynda ónersúıer qaýym úshin mańyzdy oqıǵa boldy. Eńseli ǵımarat ishinen KSRO Halyq artısi, KSRO jáne Qazaq KSR Memlekettik syılyǵynyń laýreaty, Sosıalısik Eńbek Eri, profesor Ermek Bekmuhameduly Serkebaev atyndaǵy kameralyq zal ashyldy, dep habarlaıdy Almaty-akshamy.kz.
Saltanatty ashylýǵa KSRO Halyq artısi Bıbigúl Tólegenova jáne Álibek Dinishev qatysyp, Ermek Serkebaev týraly lebizderimen bólisti. Ánshiniń eshkimge uqsamaıtyn týabitti daryny týraly oı tolǵap, adamdyq kelbeti jaıynda da baıandap, jyly estelikter aıtyp berdi.
Ermek Serkebaev kózi tirisinde «Barıtondardyń koroli» jáne «Keńes Odaǵynyń úzdik Fıgarosy» degen joǵary mártebe ıelenip, tyńdarmandarynyń yqylasyna bólengen.
Iá, áıgili opera ánshisi, akter, ustaz qazaq klasıkalyq óneriniń damýyna orasan zor úles qosqan. Onyń esimi tek Qazaqstanda ǵana emes, álem sahnalarynda aıtyldy. Ermek Serkebaev dúnıe júziniń eń úzdik degen 50-den astam sahnasynda óner kórsetken. Sońyna shyǵarmashylyq mol mura qaldyrdy. Elimizdiń talantty ánshileriniń alyp shoǵyryn tárbıelep shyǵardy. Tabıǵı daryny men jankeshti eńbeginiń arqasynda opera óneriniń shyńyna kóterildi. Onyń oryndaǵan týyndylary otandyq jáne álemdik klasıkanyń altyn qoryn toltyryp, shyǵarmashylyq jolynda júrgen talaı býynǵa shabyt berdi. Sondyqtan Ermek Serkebaevtyń esimi ulttyq mýzyka murasy tarıhynda altyn áriptermen jazylyp, esimi halyq jadynda máńgi saqtalady.
Jańadan ashylǵan kameralyq zaldyń qaq tórine Ermek Serkebaevtiń úlken portreti qoıylypty. Jaryǵy mol bólmede bolashaqta jas opera ánshileri án salatyn bolady. Olarǵa arnalyp sheberlik sabaqtary ótkiziledi. Tipti, qazaq mýzyka ónerine ólsheýsiz eńbek sińirgen ózge de óner adamdary týraly jastarǵa úlgi bolar ulaǵatty estelikter aıtý keshteri uıymdastyrylyp turmaq.
Kameralyq zaldyń ashylý saltanatynda Ermek Serkebaevtyń shákirtteri – QR Eńbek sińirgen qaıratkeri Bolatbek Bókenov, Dýlat Toqanov, Bolat Qanaǵatov ustazdarynyń eń jaqsy kórgen ánderin shyrqady.