Mısıanyń baǵalaýynsha, saılaý tynysh jaǵdaıda ótti
Eýropadaǵy qaýipsizdik jáne yntymaqtastyq uıymy (EQYU) búrosynyń demokratıalyq ınstıtýttar jáne adam quqyqtary jónindegi mısıa basshysy Ýrshýla Gasek Qazaqstandaǵy prezıdent saılaýyn baqylaý nátıjesin tanystyrdy, dep habarlaıdy Almaty-akshamy.kz QazAqparatqa silteme jasap.
Mısıa basshysynyń málimdeýinshe, Qazaqstanda prezıdent saılaýy tıimdi uıymdastyryldy.
Alaıda, saılaýda shynaıy plúralızmdi qamtamasyz etý úshin reformany odan ári jalǵastyrý qajet.
Sondaı-aq EQYU búrosynyń demokratıalyq ınstıtýttar jáne adam quqyqtary jónindegi mısıa málimdemesinde saılaý barysy jaıly aqparattar BAQ-ta keńinen jarıalanǵany aıtyldy.
«Ortalyq saılaý komısıasy saılaýǵa daıyndyq prosesin tıimdi basqaryp otyrdy jáne qaramaǵyndaǵy jergilikti saılaý komısıalaryn jan-jaqty oqytýdy qamtamasyz etti», - dedi Ýrshýla Gasek elordada ótken baspasóz máslıhatynda.
Mısıanyń baǵalaýynsha, saılaý tynysh jaǵdaıda ótti. Daýys berý kezinde tıisti prosedýralar saqtaldy.
Mısıa músheleri 1 131 ýchaskede daýys berý prosesin baqylaǵan, sonyń 95%-na oń baǵasyn berdi.
Odan bólek, Ý. Gasektiń aıtýynsha, saılaý barysyn mısıa atynan elimizdiń ár óńirinde 300-ge jýyq baıqaýshy qadaǵalady.