Taspanyń túsirilimi Almaty, Almaty oblysynyń qalalary jáne Atyraýda Mahambet Ótemisuly kesenesiniń janynda ótti
Darejan Ómirbaevtyń «Aqyn» fılmi 10-20 qarasha aralyǵynda Portýgalıada ótken Lisbon & Sintra Film Festival 2022 (LEFFEST) kınofestıvalinde bas júldeni jeńip aldy, dep habarlaıdy Almaty-akshamy.kz.
Fılm Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdıasy men Ulttyq kınony qoldaý memlekettik ortalyǵynyń qatysýymen túsirildi.
«Aqyn» fılminde tehnologıanyń damý dáýirinde túsiniksiz jáne mańyzdy emes adam bolýdan qorqatyn aqyn týraly baıandalady. Senarı nemis jazýshysy German Gesseniń «Avtorlyq kesh» áńgimesine negizdelgen. Taspanyń túsirilimi Almaty, Almaty oblysynyń qalalary jáne Atyraýda Mahambet Ótemisuly kesenesiniń janynda ótti. Basty keıipkerdi belgili ánshi jáne mýzykant Erdos Qanaev somdady», - dep habarlady «Qazaqfılm» kınostýdıasynyń baspasóz qyzmetinen.
Eske salsaq, fılmniń álemdik premerasy 2021 jyly Japonıadaǵy 34-shi Tokıo halyqaralyq kınofestıvaliniń basty baıqaýynda ótti. Onda fılm «Úzdik rejıssýra» nomınasıasy boıynsha marapattaldy. Keıin fılm Germanıadaǵy 72-shi Berlın halyqaralyq kınofestıvalinde baıqaýdan tys kórsetildi. Sondaı-aq, «Aqyn» Brazılıadaǵy Olhar de Cinema halyqaralyq kınofestıvalinde «Úzdik fılm» syılyǵyn jeńip alǵan bolatyn.
Qazaqstanda kıno kartına osy jyldyń sáýir aıynda shekteýli prokatqa shyǵaryldy. Sondaı-aq, 14 jeltoqsannan bastap «Aqyn» Fransıa kınoteatrlarynda prokatqa shyǵatyny belgili boldy.