Memleket basshysy bilim salasy qyzmetkerleriniń respýblıkalyq tamyz keńesine qatysýshylardy quttyqtady
Memleket basshysy Qasym-Jomart Toqaev bilim salasy qyzmetkerleriniń respýblıkalyq tamyz keńesine qatysýshylarǵa quttyqtaý joldady.
Prezıdent quttyqtaýyn Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenova oqyp berdi, dep habarlaıdy Almaty-akshamy.kz.
«Sizderdi bilim salasy qyzmetkerleriniń respýblıkalyq tamyz keńesiniń bastalýymen shyn júrekten quttyqtaımyn. Jańa oqý jyly qarsańynda pedagog mamandardyń basyn qosyp, óskeleń urpaqqa bilim, tárbıe berý máselesine qatysty alqaly jıyn ótkizý ıgi dástúrge aınaldy. Bul - elimizdiń bolashaǵyna yqpal etetin mańyzdy basqosý. Sapaly bilim berý básekege qabiletti, órkenıetti el bolýdyń kepili. Adamzat tarıhyndaǵy jetistiktiń barlyǵy ilim, ǵylymnyń jemisi ekendigi sózsiz. Saýatty urpaq ósirý arqyly ǵana ulttyń jańa sapasyn qalyptastyra alamyz. Ult ustazy Ahmet Baıtursynuly «Mekteptiń jany muǵalim, muǵalim qandaı bolsa, mektebi hám sondaı bolmaqshy», degen. Elimizdiń erteńi jas urpaqtyń bilimdi, eńbekqor ári otanshyl bolýyna baılanysty», - dedi Memleket basshysy quttyqtaýynda.
Prezıdent jastardy adal azamat etip tárbıeleý, olardyń boıyna izgi qundylyqtardy sińirý asa mańyzdy mindet ekendigine nazar aýdartty.
«Osy jaýapty jumysty abyroımen atqaryp júrgen ustazdar qaýymyna shynaıy rızashylyǵymdy bildiremin. Memleket bilim salasyn órkendetýge árdaıym basa mán beredi. Elimizde jastardyń jan-jaqty damýyna barlyq jaǵdaı jasalǵan. Zaman talabyna saı oqý oryndary kóptep salynýda. Arnaıy zań qabyldanyp, pedagogtardyń mártebesi quqyqtyq jaǵynan retteldi. Olardyń áleýmettik jaǵdaıyn jaqsartýǵa bas nazar aýdarylyp jatyr. Osyndaı qoldaý is-sharalary bolashaqta da jalǵasa beredi. Búgingi basqosýda jas urpaqqa ozyq bilim, ónegeli tárbıe berý máselesine qatysty salmaqty oılar men salıqaly pikirler aıtylady dep senemin. Barshańyzǵa zor densaýlyq, tolaǵaı tabys tileımin», - dedi Qasym-Jomart Toqaev.