Smart Data Ukimet arqyly anonımdi derekterge erkin qol jetkizýdi qamtamasyz etý qajet.
Prezıdent Úkimetke eki jyl ishinde jasandy ıntellektige mamandanǵan data-ortalyqtardyń qurylysyn júrgizýdi tapsyrdy, dep habarlaıdy Almaty-akshamy.kz
"Kelesi jyly Ulttyq jasandy ıntellekt platformasyn iske qosqan durys. Bul bastama memleket pen iri bıznes derekterin biriktirip, olardyń ózektiligi men qoljetimdigin qamtamasyz etýge tıis", - dedi Toqaev Digital Bridge 2023 forýmynyń plenarlyq otyrysynda.
Memleket basshysy ozyq IT-ınfraqurylym sıfrlyq ındýstrıadaǵy keleshek progreske, atap aıtqanda jasandy ıntellektiniń damýyna negiz qalaıtynyn atap ótti. Sondyqtan ınfraqurylymdy damytqan kezde IT-ónim ázirleýshilerdiń qajettiligi árdaıym aldyn ala eskerilýge tıis.
"Eń aldymen biz esepteýish ortalyqtardyń qýatyn arttyrýymyz qajet. Úkimetke eki jyl ishinde jasandy ıntellektige mamandanǵan data-ortalyqtardyń qurylysyn júrgizýdi tapsyramyn", - dedi prezıdent.
Aıtýynsha, bul iske Amazon, Google, Mastercard jáne Citigroup sıaqty álemge tanymal kompanıalardy tartýǵa bolady.
"Jaqynda Nú-Iork qalasyna jasaǵan saparymda atalǵan kompanıalardyń basshylarymen kezdestim. Tıisti ýaǵdalastyqtarǵa qol jetkizdik. Sonymen qatar jasandy ıntellektige arnalǵan derekter ekojúıesin damytý mańyzdy. Shyn máninde, jasandy ıntellektiniń "qoregi", qozǵaýshy kúshi – úlken derekter qory. Qazaqstanda osy salada túrli sheshimder júzege asyryldy", - dep jalǵastyrdy sózin prezıdent.
Toqaevtyń aıtýynsha, memlekettik organdarda jınaqtalǵan ushy-qıyrsyz derekter qoryna qoljetimdilik shekteýli bolýyna baılanysty onyń áleýeti áli tolyq paıdalanylmaı otyr.
"Bul jerde aqparattyń "ashyqtyq prezýmpsıasyn" basshylyqqa alý kerek. Smart Data Ukimet arqyly anonımdi derekterge erkin qol jetkizýdi qamtamasyz etý qajet. Men bul jerde barlyq aqparattyń anonımdi bolǵany ári senimdi qorǵalǵany jón ekenin aıtyp otyrmyn. Jeke derekterdiń taralyp ketýine qatysty barlyq qaýipti joıý kerek", - dedi memleket basshysy.