QR Indýstrıa jáne ınfraqurylymdyq damý mınıstri Qaıyrbek Óskenbaev osylaı dedi.
Osy máseleniń oń sheshimin tabý úshin mınıstrlik janynan «Berekeli bastama» portalyn iske qosylady, dep habarlaıdy Almaty-akshamy.kz QR Indýstrıa jáne ınfraqurylymdyq damý mınıstrliginiń baspasóz qyzmetine silteme jasap.
Mınıstrdiń aıtýynsha, qalalardyń turaqty ósýi qala keńistigin qalyptastyrýdyń jańa tásilderin, qala qurylysy reglamentterin naqty saqtaýdy talap etedi. Biraq qazirgi ýaqytta elimizde qalalardyń damý perspektıvalary men jurtshylyqtyń pikiri eskerilmeı, retsiz salynýda.
QR Indýstrıa jáne ınfraqurylymdyq damý mınıstrligi Qazaqstannyń ýrbanıster qaýymdastyǵymen birlesip, «Berekeli bastama» portalyn iske qosady. Onda ár azamat óz qalasynyń ınfraqurylymyn jaqsartý týraly usynystar aıtyp, ózekti bastamalarǵa daýys bere alady.
Bul týraly QR Prezıdenti janyndaǵy Ortalyq komýnıkasıalar qyzmetinde ótken dóńgelek ústel barysynda QR Indýstrıa jáne ınfraqurylymdyq damý mınıstri Qaıyrbek Óskenbaev málimdedi.
«Mysaly, Almaty turǵyndary qumyrsqanyń ıleýi sıaqty tym kóp adam turatyn úılerge, elorda turǵyndary demalys oryndary men áleýmettik nysandar salmaı, ǵımarattardyń óte tyǵyz boı kóterip jatqanyna shaǵymdanady. Qazir ýrbanıster men qala turǵyndarynyń pikirlerin eskere otyryp, qalalarda ózgeris jasaý - óte mańyzdy. Ár azamat óz qalasyn damytýǵa qatysa alýy úshin halyq pen memleket arasyndaǵy dıalogqa basa nazar aýdarýymyz kerek. Dál osy maqsatta Qazaqstannyń ýrbanıster qaýymdastyǵymen birlesip, «Berekeli bastama» daýys berý portalyn iske qosamyz,- dedi QR Indýstrıa jáne ınfraqurylymdyq damý mınıstri.
Qaıyrbek Óskenbaev portalda qalanyń ár turǵyny ınfraqurylymdy jaqsartý boıynsha usynystar bere alatynyn aıtty. Barlyq jobalardy ýrbanıster ǵylymı turǵydan zerttep, sodan keıin úzdikteri daýys berý portalynda jarıalanady. Onyń qorytyndylary boıynsha qarjylandyrý jáne iske asyrýdaǵy basymdyqtar aıqyndalady.