2022 jyly birqatar jańa óndiris ashylady.
Búgin Úkimet otyrysynda QR Indýstrıa jáne ınfraqurylymdyq damý mınıstri Beıbit Atamqulov qurylys salasynda kelesi jyly ashylatyn jańa óndirister týraly aıtty, dep habarlaıdy Almaty-akshamy.kz Úkimettiń resmı saıtyna silteme jasap.
Olardyń ishinde mynalardy atap ótýge bolady:
- «Orient Ceramic» jaýapkershiligi shekteýli seriktestiginiń iri kólemdi keramıka plıtkalardy óndirý zaýyty. Qýattylyǵy 3 mln sharshy metr (ınvestısıa kólemi - 7 mlrd teńge, 250 jumys orny);
- «Bolashak Electric» jaýapkershiligi shekteýli seriktestiginiń jabyq vakýmdy ajyratqyshtar men mıkro-prosessorlyq júıelerdi óndirý zaýyty (ınvestısıa kólemi – 3 mlrd teńge, 100 jumys orny);
- «Valtherm» jaýapkershiligi shekteýli seriktestiginiń radıatorlar óndirý zaýyty (ınvestısıa kólemi – 3,6 mlrd. teńge, 100 jumys orny);
- «SG Brick» jaýapkershiligi shekteýli seriktestiginiń elimizdegi eń iri kirpish zaýyty. Qýattylyǵy jylyna 100 mln kirpish (ınvestısıalar kólemi –11,2 mlrd teńge, 50 jumys orny).
«İshki naryqty otandyq óndiristiń neǵurlym suranysqa ıe qurylys taýarlarymen (sanfaıans, lamınattalǵan jabyn, shyny maqta, qysh taqtaısha, bólmearalyq esik, jylý oqshaýlaǵysh materıaldar) qamtamasyz etý jumystary jalǵasady. «Samruk-Kazyna Construction» aksıonerlik qoǵamymen birlesip jalpy somasy 601,3 mlrd teńgege 35 ımportty almastyratyn jobany iske asyryp, 8 616 jańa jumys ornyn ashý josparlanýda», - dedi B. Atamqulov.
Onyń aıtýynsha, sanfaıans, keramıka plıtka, mıneraldyq jylytqysh, aǵash-jońqa taqtasy sıaqty otandyq qurylys taýarlarymen qamtamasyz etý boıynsha jańa óndiristerdi ashý kózdelip otyr.
«Bul jobalardy iske qosý ishki naryqtaǵy ımport úlesin shamamen 60 paıyzǵa tómendetedi jáne qurylys materıaldary baǵasynyń aýytqýyn boldyrmaıdy. Jańa jobalardy iske qosý 2025 jylǵa qaraı ónimniń 10-nan astam túri boıynsha ortasha jyldyq qajettilikti 700 mln AQSH dollary kóleminde óteýge múmkindik beredi. Taýar pozısıalary boıynsha – temir beton buıymdary, beton, qurǵaq qospa, lak boıaý, kirpish, shyny, kabel, aǵash-jońqa taqtalary jáne qasbettik taqtalar boıynsha ishki naryq suranysyn 100% jabý josparlanýda», - dedi vedomstvo basshysy.
Sonymen qatar, ishki naryqtyń 50% astamy ımportqa táýeldi qurylys materıaldary - alúmını radıator, polıetılen qubyr, shatyr materıaldary, radıator, metal jabyndar, esik bloktary, keramıka plıtka, sanfaıans jáne armatýra boıynsha suranysty jabý josparlanyp otyr.