QR Premer-Mınıstriniń orynbasary Eraly Toǵjanov Májilis ókilderiniń depýtattyq saýalyna joldaǵan jaýabynda aýrýhanalardaǵy klınıkalyq dárigerlerdiń tapshylyǵy qalaı sheshiletinin túsindirdi, dep habarlaıdy Almaty-akshamy.kz QazAqparatqa silteme jasap.
«Taldaýlar aýdandyq aýrýhanalarda ǵana emes, qalalyq jáne oblystyq deńgeılerde de kadr tapshylyǵy bar ekenin kórsetti. Jyl saıyn rezıdentýrada bilikti mamandarmen qamtamasyz etý úshin klınıkalyq mamandyqtar boıynsha kadr daıarlaýǵa memlekettik bilim berý tapsyrysy bólinedi. 2021 jyly sonyń aıasynda 1500 oryn bólindi. Onyń ishinde 26 nevrolog, 200 anestezıolog-reanımatolog, 18 neırohırýrg bar», - delingen jaýapta
Onyń aıtýynsha, jyl saıyn respýblıkalyq búdjetten medısına qyzmetkerleriniń kásibı deńgeıin arttyrýǵa qarajat bólinedi. Atap aıtqanda, 2020 jyly biliktilikti arttyrýdan 10 578 dáriger ótken. Onyń ishinde 743 anestezıolog-reanımatolog, 269 nevrolog, 49 medısınalyq reabılıtolog, 34 neırohırýrg bar.
«2021 jyly jergilikti búdjetter esebinen 161 maman shetelde oqýdan ótti. Sheteldiń jetekshi mamandarynyń qatysqan master-klastarda 734 adam oqytyldy. Onyń ishinde 30 adam «Insýlt alǵan naýqastardy ońaltýdaǵy mýltıdısıplınarlyq tásil» taqyrybynda (Reseı Federasıasy), 11 adam «Julyn neırohırýrgıasynyń ózekti máseleleri» taqyrybynda» (Germanıa) bilimin jetildirdi. Bıyl «Insýlt kezinde medısınalyq kómek kórsetý» baǵyty boıynsha 154 dáriger (nevrolog, medısınalyq reabılıtolog, neırohırýrg) jáne 220 orta medısınalyq qyzmetkerdi oqytý kózdelgen,» - dep jazady Premer-Mınıstrdiń orynbasary.