Mádenıet salasynda 1 mln-nan astam balany qamtıtyn birqatar aýqymdy joba júzege asqan.
Bıyl Balalar jyly bastalǵaly beri 69 aýqymdy is-shara ótkizilgen, dep habarlaıdy Almaty-akshamy.kz Almaty.tv-ge silteme jasap.
Mádenıet jáne sport mınıstrligi «Ulaǵatty urpaq», «Talanttar aramyzda», «Meıirim» festıvali syndy jobalardy júzege asyryp, 1 mıllıonnan astam bóbek osy baǵdarlamalarǵa qatysty dep otyr.
Mádenıet jáne sport mınıstrligi Balalar jylynda qolǵa alynǵan jobalardyń barlyǵy júzege asyryldy deıdi. Baǵdarlama aıasynda 1 mln-nan astam bala qamtylǵan eken. Onyń ishinde respýblıkalyq «Ulaǵatty urpaq» mádenı bilim berý onlaın jobasy bar. Búginde ol saıttar men áleýmettik jelilerde júrgizilýde. Osy kúni qaralym sany 2 mln-nan asypty.
«Balalar ádebıetine arnalǵan «Dana bala» veb-saıty jumys istep tur. Búgingi tańda 5 myńnan astam kitapty saıtqa ornalastyrdyq. Sonymen qatar, erekshe qabileti bar balalardyń shyǵarmashylyq áleýetin ashýǵa arnalǵan «Talanttar aramyzda» respýblıkalyq kórme festıvalin ótkizdik. Oǵan 250-den astam bala qatysty», – dedi QR Mádenıet jáne sport vıse-mınıstri Nurǵısa Dáýeshov.
Mádenıet mınıstrliginiń aqparyna saı, atqarylǵan ister aýqymdy. Alaıda vedomstvanyń muryndyq bolýymen jyl boıy jasalǵan sharalardy halyqtyń biri bilse, biri bilmeıdi eken.
Balalar jylynda jaqsy este qalǵan «Artsport» jobasy edi. Baǵdarlama arqyly mıllıondaǵan bóbek qalaǵan úıirmesine qatysyp, óziniń boıyndaǵy ónerin ashqan bolatyn. Alaıda platforma sońǵy kezderi toqtap, qarjylandyrý jergilikti búdjetten beriletin boldy.
«Qazirgi tańda bıyldyń ózinde keıbir qarjy jetispeý máselelerine baılanysty Úkimet tarapynan da «Artsport» baǵdarlamasyna qarjy bólinip otyr. Bolashaqta ár óńir óziniń tıisti jumystaryn búdjettik josparlaý kezinde naqty esebin jobalaıdy degen senimdemiz», – dedi QR Mádenıet jáne sport vıse-mınıstri Nurǵısa Dáýeshov
Qysqasy, bıyl Balalar jylynda olar mýzeıge tegin kirdi, tegin saıahattady, tegin kıno kórdi. Túrli festıválder men baıqaýlar uıymdastyryldy. Mádenıet jáne sport mınıstrliginiń aıtýynsha, balalardy qoldap, damytý bir jyldy arnaýmen shektelmeıdi. Ary qaraıda balalarǵa qajetti kontentter kóbeıip, túrli sharalar uıymdastyrylady.