Aýyl mektepteri oqýshylarynyń respýblıkalyq olımpıadasy bıylǵy jyldyń qarasha jáne 2024 jyldyń qańtar aılary aralyǵynda alǵash ret ótkiziledi.
Atalmysh bastama qala men aýyl mektepteri arasyndaǵy alshaqtyqty azaıtýǵa baǵyttalǵan. Bul týraly QR Oqý-aǵartý mınıstrliginde ótken apparat otyrysynda belgili boldy, dep habarlaıdy Almaty-akshamy.kz.
«Daryn» respýblıkalyq ǵylymı-praktıkalyq ortalyǵynyń dırektory Ǵajdembek Tursynovtyń aıtýynsha, olımpıadaǵa aýyl mektepteriniń 9-11 synyp oqýshylary qatysa alady. Mundaǵy maqsat – elimizdiń shalǵaı eldi mekenderindegi daryndy jáne talantty balalardyń qabiletterin anyqtap, damytý, halyqaralyq olımpıadalarǵa qatysýǵa yntalandyrý.
«Respýblıkalyq olımpıadalarda akademıalyq adaldyqty qamtamasyz etý úshin tapsyrmalar ár qatysýshyǵa jeke elektrondy túrde jiberiledi. Olımpıadanyń barlyq kezeńderinde oqýshylardyń aty-jóni kórinbeıdi. Ár kezeńnen keıin tapsyrmalardyń skanerlengen nusqasy, qatysýshylardyń jumystary men durys jaýaptar ortalyqtyń saıtynda jarıalanady», - deıdi «Daryn» respýblıkalyq ǵylymı-praktıkalyq ortalyǵynyń dırektory.
Joǵaryda atalǵan qaǵıdalardyń barlyǵy eń bedeldi álemdik IMO, IPhO, IChO, IBO, IGeO, IOI jáne IOL olımpıadalardyń erejelerine súıenip jasaqtalǵan. Bul olımpıadalarda jeńimpaz bolǵan qazaqstandyqtarǵa memleket tarapynan 500-den 1500 AEK-ke deıin qarjylyq qoldaý kórsetiledi. Bıylǵy jyly 23 oqýshy júldeli oryndarǵa ıe boldy.
«Qazaqstandyq oqýshylardyń osyndaı joǵary jetistikterin eskere otyryp, halyqaralyq uıymdastyrý komıteti bıologıadan eń bedeldi álemdik olımpıadany 2024 jyly Astanada ótkizý týraly sheshim qabyldady. Oǵan 80 elden 330-ǵa jýyq úzdik jas bıolog qatysady dep kútilýde», - deıdi Ǵajdembek Tursynov.
Oqý-aǵartý mınıstri Ǵanı Beısembaev atap ótkendeı, mundaı aýqymdy sharanyń ótkizilýi – elimizdiń búkil oqý-aǵartý salasynyń jetistigi men joǵary mártebe.
«Pándik olımpıada – balalardyń sanasynda alǵashqy ǵylymı izdenisterge jol salatyn, bolashaq ǵalymdardy shabyttandyratyn, ǵylymmen erkin aınalysatyn jastar tobyn qalyptastyratyn eń aýqymdy baǵdarlamalyq saıys. Qazaqstandyq mektep oqýshylarynyń bedeldi olımpıadalarǵa qatysý reıtıńi jeńis qorjynynda medaldar sanynyń kóbeıgenin, bilim sapasynyń artqanyn kórsetedi. Sondyqtan respýblıkalyq olımpıadalardyń árqaısysynyń sapaly ári joǵary deńgeıde ótýi mańyzdy», – dep qorytyndylady Ǵanı Beısembaev.
Aıta ketý kerek, elimizde jyl saıyn jalpy bilim beretin pánder boıynsha mektep oqýshylary arasynda olımpıadalar uıymdastyrylady. Olarǵa 300 myńǵa jýyq mektep oqýshysy qatysýda.