Elimizde qarjy pıramıdalaryna qatysty qylmys sany ósti
Sońǵy bes jylda alaıaqtyq pen qarjy pıramıdalaryna qatysty qylmystar 26 paıyzǵa ósti. Bul týraly Senattyń Konstıtýsıalyq zańnama, sot júıesi jáne quqyq qorǵaý organdary komıtetiniń otyrysynda depýtat Vladımır Volkov aıtty, dep habarlaıdy almaty-akshamy.kz
Komıtet tóraǵasy V. Volkov otyrysty asha kelip, sońǵy bes jyl ishinde osy saladaǵy qylmystyń 26%-ǵa kóbeıgeni týraly derekti keltirdi. Olardyń qataryna ǵalamtordaǵy qylmystar da bar. Ótken jyldyń qorytyndysy boıynsha, ol qylmystardyń sany 2,5 ese ósip, 4 250 myńnan 10 myńǵa deıin kóbeıip ketken.
«Qazirgi jaǵdaıda kıberqylmysta tergeý shekarasy joq jáne ol transshekaralyq sanatqa aýysyp ketedi. Bul elderdi halyqaralyq deńgeıde birlesken is-qımyl jasaýǵa májbúr etedi. Osyǵan baılanysty kıberqylmyspen kúres salasyndaǵy halyqaralyq sarapshylardyń halyqaralyq standarttar talaptaryna saı keletin qazaqstandyq zańnama normalaryn qaıta qaraý jáne pysyqtaý jónindegi usynymdaryn zerdeleý jáne talqylaý mańyzdy bolyp otyr», - dedi senator.
Senator Lázzat Súleımen óz kezeginde alaıaqtyqtyń qurbandary kóbinese halyqtyń áleýmettik osal toptarynyń ókilderi ekenin atap ótti. Depýtat osyǵan baılanysty qazaqstandyqtardyń qarjylyq saýatyn arttyrý aıasynda qarjy pıramıdalaryna qarsy is-qımyl boıynsha buqaralyq aqparat quraldarynda túsindirý jumystaryn kúsheıtýdi usyndy.
Bas prokýratýranyń aqparaty boıynsha, qylmystyń osy túrlerine qarsy is-qımyl jasaý úshin mekemearalyq jumys toptary quryldy, yntymaqtastyq týraly memorandýmdar, ádistemelik quraldar ázirlendi. Sondaı-aq mıkrokredıtter berý qaǵıdalaryna ózgerister engizilip, qylmystardy ashý jáne tergeý boıynsha jedel tergeý toptary qurylǵan eken.
İshki ister mınıstrliginiń ókili múddeli memlekettik organdar sheteldik kıberqylmysqa qarsy is-qımyl jónindegi quqyq qorǵaý organdarymen 2018 jyldan bastap Eýropa Keńesiniń Kompúterlik qylmystar jónindegi Býdapesht konvensıasyna Qazaqstannyń qosylýy jóninde is-sharalar júrgizip jatqanyn habarlady. Búgingi kúni Konvensıa osy salada halyqaralyq ózara is-qımyldy qamtamasyz etetin ámbebap qujat bolyp sanalady.
Senatorlar otyrys nátıjesi boıynsha qorytyndy daıyndady. Olardyń qatarynda alaıaqtyq áreketter men qarjy pıramıdalaryna qarsy is-qımyl salasyndaǵy halyqaralyq qujattar men standarttardyń talaptaryn eskere otyryp, zańnamany jetildirý jónindegi mekemearalyq jumys tobyn qurý, sondaı-aq naqty termınologıany ázirleý, kıberkeńistiktegi quqyqtyq qatynastar sýbektileriniń quqyqtary men jaýapkershiligin aıqyndaý, kıber quqyq buzýshylyqtyń belgilerin, is júrgizý erekshelikterin saralaý týraly usynystar bar.