Qalalyq ákimshilik pen Qazaqstannyń kógaldandyrý qaýymdastyǵy Jetisý aýdanynyń «Kókjıek» yqshamaýdanynda «Almaty Clean & Green» atty qalalyq ekologıalyq aksıasyn uıymdastyrdy.
Atalmysh aksıaǵa qalanyń barlyq qurylymdary qatysty. Tazalyq aksıasy aıasynda 150-ge jýyq akasıa kósheti otyrǵyzyldy. Qala ákimshiligi qajetti qolǵap, qap, kúrek, tyrma sekildi jabdyqtarmen qamtamasyz etti. Aksıaǵa qatysýshylarǵa aýyz sý, ystyq baýyrsaq taratyldy.
Senbilik bastalar aldynda 15 mınýttyq jattyǵý jasalyp, qatysýshylardyń jumysqa degen qabiletin arttyrdy.
- Búgin bizdiń aýdanda kezekti senbilik ótip jatyr. Oǵan tek aýdannyń ǵana emes, búkil qalamyzdyń turǵyndary atsalysyp jatyr. Barlyq sala qurylymdary men jastar belsendilik tanytýdy. Kógaldandyrý barysynda aýmaqtar túgel tazartyldy. Búgin senbilikti ótkizýge 47 birlik tehnıka jumyldyrylyp, 300-den astam adam qatysty. Jetisý aýdany boıynsha mundaı tazalyq aksıasy Soltústik aınalym aýdanynda, «Aınabulaq-4» yqshamaýdanyndaǵy jáne «Kókjıekte» ótkizilip jatyr, - dep atap ótti Jetisý aýdany ákiminiń orynbasary Jandos Rahymǵalıev.
Senbilik sońynda qatysýshylar arasynda baǵaly syılyqtar utys oıyny oınatylyp, ekologıalyq taqyrypta vıktorına ótkizildi.