Sheteldik sarapshy Edgar Sıberger Qazaqstanǵa atom elektr stansıasyn (AES) salýdyń elge ákeletin artyqshylyqtary týraly pikir bildirdi. Onyń aıtýynsha, Qazaqstan óziniń ıadrolyq áleýetin damytý arqyly energetıkalyq táýelsizdigin nyǵaıtyp, elektr energıasynyń tapshylyǵyn azaıtady, sondaı-aq bolashaqta kórshi elderge energıa eksporttaıtyn mańyzdy serikteske aınalady.
Edgar Sıberger, Assystem kompanıasynyń bıznesti damytý boıynsha sarapshysy: – Qazaqstannyń Ortalyq Azıadaǵy strategıalyq ornalasýy atom energetıkasynyń damýy arqyly jańa múmkindikterge jol ashady, biraq belgili bir qıyndyqtar da týdyrýy múmkin. Reseı men Qytaı sıaqty eki ıadrolyq alpaýyt el Qazaqstandaǵy AES-tiń damýyna qyzyǵýshylyq tanytýda. Osy jaǵdaılarda Qazaqstan muqıat ári salmaqty qadamdar jasaýy tıis. Sonymen qatar, elde ýran qorynyń mol bolýy tabıǵı artyqshylyq beredi, bul Qazaqstannyń aımaqtyq energetıkalyq naryqtaǵy negizgi oıynshy bolýyna múmkindik týǵyzady.
AES qurylysy Qazaqstanǵa tek ishki energetıkalyq suranysty qanaǵattandyrýmen shektelmeı, aımaqtaǵy energıa eksporttaýshy el retinde óz pozısıasyn nyǵaıtýǵa kómektesedi. Álemdik naryqta ýrannyń iri jetkizýshisi bola otyryp, el óziniń osy artyqshylyǵyn paıdalanýy múmkin. Ásirese, energetıkalyq qýattylyǵy artyp kele jatqan Qytaı men Reseı naryqtary Qazaqstannyń energıa eksporttaýshy retindegi rólin mańyzdy etedi.
Energetıkalyq naryqtaǵy jańa múmkindikter AES qurylysy eldiń energetıkalyq júıesin jańǵyrtýǵa jáne elektr energıasyn óndirýde turaqty kózderge qol jetkizýge kómektesedi. Bul kómirqyshqyl gazynyń shyǵarylýyn azaıtyp, Qazaqstannyń ekologıalyq turaqtylyqqa kóshýine yqpal etedi. Sonymen birge, Qazaqstan Ortalyq Azıanyń energetıkalyq haby retinde óziniń rólin kúsheıte alady.
Sıberger atap ótkendeı, eldegi ýran qory AES úshin mańyzdy resýrs bolyp tabylady. Qazirdiń ózinde Qazaqstan álemdegi eń iri ýran jetkizýshileriniń biri, jáne bul resýrsty tıimdi paıdalaný eldiń uzaq merzimdi energetıkalyq strategıasyn júzege asyrýǵa múmkindik beredi. Iadrolyq energetıka salasynda halyqaralyq yntymaqtastyqty damytý, onyń ishinde Reseı, Qytaı, jáne basqa da ıadrolyq derjavalarmen áriptestik, Qazaqstanǵa qosymsha múmkindikter ashýy yqtımal.
Energetıkalyq táýelsizdik pen qaýipsizdik Energetıkalyq táýelsizdikke qol jetkizý Qazaqstannyń ekonomıkalyq qaýipsizdigin kúsheıtip qana qoımaı, eldiń energetıkalyq júıesiniń turaqtylyǵyn arttyrady. Álemde kómir men gazdyń baǵasy turaqsyz bolyp turǵan kezde, atom energetıkasy senimdi jáne turaqty elektr energıasy kózi retinde qarastyrylýda. Qazaqstan úshin bul energetıkalyq ártaraptandyrý jáne uzaq merzimdi ekonomıkalyq turaqtylyqqa jol ashady.
Edgar Sıbergerdiń aıtýynsha, Qazaqstan ıadrolyq áleýetin damyta otyryp, halyqaralyq energetıkalyq naryqta bedeldi oıynshy bolý múmkindigin tıimdi paıdalaný kerek.