«Folıant» baspasy atalǵan kitapty qazaq tiline aýdarýǵa avtorlyq quqyqqa ıe.
Eýrazıalyq halyqaralyq kitap jármeńkesinde «Saqınalar ámirshisi» trılogıasynyń qazaq tilindegi birinshi bólimi qalyń oqyrmannyń nazaryna usynyldy, dep habarlaıdy Almaty-akshamy.kz 24.kz-ke silteme jasap.
Alǵash ret túpnusqadan qazaq tiline aýdarylǵan trılogıanyń ekinshi jáne úshinshi bólimderin 2022 jyldyń sońyna deıin basyp shyǵarý josparlanǵan. «Saqınalar ámirshisi» roman-epopeıasyn avtor 1937 jyly bastap, 1948 jyly aıaqtaǵan. Sodan beri kitap 38 tilge aýdarylǵan.
«Fentezıdiń atasy» atanǵan Djon Tolkın tańǵajaıyp Jerorta álemin qurdy. Ol tek jazýshy ǵana emes, ádebıet ǵylymynyń doktory, sýretshi, profesor, fılolog-lıngvıst bolǵan. Mine, osyndaı bilimdiliginiń, ámbebaptyǵynyń arqasynda ol óz shyǵarmalarynda jasandy elfter, gnomdar jáne orkter, t.b. arnaıy til oılap tapqan.
Solardyń ishinde eń tanymaly – elfter tili. Tipti Oksfordta elftar tilin oqytatyn arnaıy kýrstar da bar. Ol-ol ma, týrızm salasyndaǵy fenomen – Tolkın-týrızm de bar: «Saqınalar ámirshisiniń» jankúıerleri shyǵarma oqıǵalary ótetin jerlerge saıahattaıdy. Jazýshy batyrlyq epopeıany, ertegi men shytyrman oqıǵaly romandy biriktirip, tamasha kórkem týyndy jasap shyqqan. Romannyń astarly syry men mazmunyna tereń boılaı otyryp, aǵylshyn tilinen aýdarǵan Altynjan Iralıeva.