Qazaq tilin úırenýge nıettengenderdiń deni - Dımash Qudaıbergenniń «Dears» jankúıerleri
Aqpan aıynan bastalǵan «Onlaın qazaq tili» kýrsyna álemniń 23 elinen 800 adam tirkeldi, dep habarlaıdy Almaty-akshamy.kz
Tirkelgenderdiń ishinde etnıkalyq qazaqtardan bólek, tilimizge qyzyǵýshylyq tanytqan ózge ult ókilderi de bar. Etnıkalyq qazaqtar tarıhı tilin umytpaý jáne Qazaqstanda bilim alyp, atamekende jumys isteý úshin qazaq tilin jetik meńgerip jatyr.
Al ózge ult ókilderiniń til úırenýdegi maqsaty eki baǵytqa negizdelgen. Alǵashqylary Qazaqstanda jumys isteý úshi kerek dese, ekinshileri - qazaq tiline qyzyǵýshylyq tanytatyn jáne tildik qurylysyn zertteıtin ǵalymdar.
Ózge ult ókilderiniń basym kópshiligi - Dımash Qudaıbergenniń «Dears» jankúıerleri. Olardyń aıtýynsha, ánshiniń ánderin, suhbattaryn ana tilinde erkin túsinip, sonymen qatar, qazaqtyń tarıhymen, mádenıetimen tereńirek tanysý úshin qazaq tili sabaqtaryna zor yqylaspen qatysady. Sabaq orys, aǵylshyn, túrik, parsy tilderinde júrgizilip, tyńdaýshylarǵa yńǵaıly ýaqytqa qoıylǵandyqtan, qatysýshylar sany artyp keledi.
Sabaq qazaq tiliniń ámbebap oqýlyǵy jáne «Abai institute» platformasy negizinde júrgiziledi.