Májilis depýtaty Elnur Beısenbaev premer-mınıstrdiń orynbasary Eraly Toǵjanovqa joldaǵan depýtattyq saýalynda jasóspirimder arasyndaǵy qylmys pen qaıǵyly oqıǵalardy kóterdi, - dep habarlaıdy Aqshamnews.kz tilshisi.
15 kúnde – 3 qaza
Jambyl oblysynda oqý jyly bastalǵaly úsh jasóspirim túrli janjal saldarynan kóz jumǵan.
-
Tarazda 9-synyp oqýshysy mektep dárethanasynda tóbeles kezinde qaza tapty.
-
Shý aýdanynda fýtbol oıyny kezinde týǵan janjaldyń sońy 10-synyp oqýshysynyń ólimine ákeldi.
-
Al 1 qyrkúıekte kolejge endi túsken stýdent qatarlasyn pyshaqtap óltirgen.
"Bas-aıaǵy 15 kúnniń ishinde bir ǵana óńirde 3 birdeı oqýshynyń kisi qolynan ajal qushýy – dabyl qaǵarlyq jaǵdaı!" – dedi depýtat.
Resmı statısıka
2024 jyly jasóspirimderdiń qatysýymen 1 973 qylmys tirkelse, onyń ishinde 130-y - asa aýyr qylmys. Al bıylǵy segiz aıda 938 qylmys bolǵan. Jyl aıaǵyna deıin bul kórsetkish byltyrdan da asyp túsýi múmkin.
Qylmystyń kóbi Shymkent (131), Almaty (115) jáne Astana (92) qalalarynda tirkelgen.
Sebep nede?
Depýtat jaǵdaıdyń ýshyǵýyna birneshe faktordy atady:
-
mektepterde tárbıe jumysynyń qaǵaz júzinde qalyp qoıýy;
-
balalardyń emosıasyn basqarý daǵdysynyń damymaýy;
-
mektep psıhologtarynyń jetkiliksizdigi;
-
ıývenal polısıa men komısıalardyń formaldy jumysy;
-
ata-analardyń jaýapkershiliginiń tómendigi;
-
smartfonǵa táýeldilik.
Usynystar
Elnur Beısenbaev bul jaǵdaıdy toqtatý úshin mynadaı sharalardy usyndy:
-
Barlyq mektepke antıbýllıngtik baǵdarlamany engizý.
-
Psıhologıalyq kómek qyzmetin kúsheıtip, balalarǵa emosıany basqarý men janjaldyń aldyn alý daǵdylaryn úıretý.
-
Sporttyq jáne kópshilik is-sharalardy qundylyqtarǵa tárbıeleý men komandalyq rýhty arttyrýǵa baǵyttaý.
-
Mektepterde smartfon paıdalanýdy shekteý.