Keıbir azamattar qandaı medısınalyq qyzmetterdi tegin medısınalyq kómektiń kepildendirilgen kólemi (TMKKK) jáne mindetti áleýmettik medısınalyq saqtandyrý (MÁMS) aıasynda alýǵa bolatynyn bilmeıdi. Al emhanaǵa tirkelý arqyly kóptegen medısınalyq qyzmetti alyp, qarajatty únemdeýge bolady.
Osy jaıly tolyǵyraq bizge Áleýmettik medısınalyq saqtandyrý qory Almaty qalasy fılıalynyń baspasóz qyzmeti aıtyp berdi.
Áleýmettik medısınalyq saqtandyrý qorynda emhanańyzdy bilýdiń qanshalyqty mańyzdy ári tıimdi ekenin taǵy bir márte eske salady.
«Azamattardan kelip túsetin ótinishterdiń basym bóligine zer salsaq, olardyń kópshiligi qaı qyzmetterdiń saqtandyrýsyz kórsetiletinin, qaısysy MÁMS paketine kiretinin bilmeıdi. Shyn máninde emhanada profılaktıkalyq tekserýden bastap kúrdeli operasıalarǵa deıin kóptegen qyzmet túrin alýǵa bolady. Eger óz quqyǵyńyzdy bilip, tirkelgen emhanańyzǵa júginseńiz, munyń bári tegin kórsetiledi», – dedi ÁMSQ baspasóz qyzmeti.
Qaıda barý kerek?
Medısınalyq qyzmetterdi paıdalaný úshin eń aldymen óz emhanańyzdy jáne ýchaskelik dárigerińizdi bilý mańyzdy.
Eger siz buryn-sońdy emhanaǵa barmaǵan bolsańyz, tirkelgen medısınalyq uıymdy eGov.kz portalyndaǵy jeke kabınetten nemese eGov Mobile mobıldi qosymshasynan bile alasyz.
Keıbir óńirlerde (mysaly, iKomek) anyqtama qyzmetteri bar, olar sizdiń turatyn mekenjaıyńyzǵa sáıkes keletin medısınalyq uıymdy anyqtaýǵa kómektesedi. Sonymen qatar, bul týraly óńirlik densaýlyq saqtaý basqarmalarynan da keńes alýǵa bolady.
Aıta keteıik, qajet bolǵan jaǵdaıda – jylyna eki ret óz qalaýyńyz boıynsha, sondaı-aq turǵylyqty jerdi aýystyrýǵa baılanysty nemese tirkeý kampanıasy kezinde emhanany aýystyrýǵa bolady(tolyǵyraq http://zan.gov.kz/client/#!/doc/148575/rus). Bul qyzmet eGov.kz portaly arqyly kórsetiledi.
Bul – negizgi mınımým
Qaı emhanaǵa tirkelgenińizdi bilgen soń, sol jerge júginip, qajetti medısınalyq kómekti ala alasyz. Ár tirkelgen azamat jyl saıyn óz emhanasynda profılaktıkalyq tekserýden ótýge quqyly. Bul aýrýlardy erte kezeńde anyqtaýǵa jáne densaýlyqty saqtaýǵa múmkindik beredi.
Eń aldymen – flúorografıa. Ol ókpe aýrýlaryn erte anyqtaý úshin jylyna bir ret jasalady.
Sonymen qatar, jyl saıyn dárigerge deıingi tekserý kabınetine barý qarastyrylǵan. Onda arterıalyq qysym, qandaǵy qant mólsheri, boı, salmaq jáne kórý ótkirligi ólshenedi. Eger siz medısınalyq aqparattyq júıeniń mobıldi qosymshasyn paıdalansańyz, ýchaskelik dárigerge jazylmas buryn osyndaı kabınetke barý qajettiligi týraly habarlamalar alyp júrgen bolarsyz. Bul kabınetke joldama da, aldyn ala jazylý da qajet emes, qyzmet kórsetý ádette kezekpen júzege asyrylady.
Áıelder mindetti túrde aldyn ala qaralý kabınetine barýy kerek. Onda profılaktıkalyq tekserý júrgizilip, shaǵymdar týraly suralady, onkosıtologıaǵa jaǵyndy alynady jáne jalpy áıelderdiń densaýlyq jaǵdaıy baǵalanady.
Sonymen birge jasyna baılanysty erler men áıelderge, shaǵymnyń bar-joǵyna qaramaı kórsetiletin mańyzdy medısınalyq qyzmetterdiń biri – skrınıngtik tekserýler. Olar júrek-qan tamyrlary, onkologıalyq jáne basqa da aýrýlardy erte kezeńde anyqtaýǵa baǵyttalǵan.
Aıta keterligi, osyndaı tekserýlerden turaqty túrde ótý máselelerdi ýaqytyly anyqtap, asqynýlardyń aldyn alýǵa múmkindik beredi.