Dúnıejúzilik densaýlyq saqtaý uıymy sapasyz dári-dármekten jylyna 1 mıllıon adamǵa deıin kóz jumatynyn aıtady.
Dárilik zattardy sıfrlyq tańbalaýdyń birinshi kezeńi qyrkúıek aıynan bastap kúshine enedi, dep habarlaıdy Almaty-akshamy.kz
Osylaısha kez kelgen dáriniń zańdy nemese zańsyz shyǵarylǵanyn teksere alasyz.
El Úkimeti dárilik preparattardy tańbalaýdyń tarıfin bekitti. Alǵashqy kezeńge 90 ataý engizilgen. Keler jyldyń sońyna deıin barlyq dári-dármek sıfrlyq markalaýdan ótedi. Táýelsiz sarapshylardyń málimetinshe, elimizde dári-dármektiń zańsyz aınalymy 12%. Bul ondaǵan mlrd teńgege jetýi múmkin.
Al álemde kontrafaktili dáriniń úlesi 20% shamasynda. Dúnıejúzilik densaýlyq saqtaý uıymy sapasyz dári-dármekten jylyna 1 mıllıon adamǵa deıin kóz jumatynyn aıtady.
«Sıfrlyq tańbalaý engizetin tizim óte úlken. Dárilik zattar mindetti tańbalaýǵa jatatyn mańyzdy taýarlar tobynyń qataryna kiredi. Tıisti normatıvtik qujattar bekitildi. Qyrkúıek aıynda kúshine enetin buıryqqa saı, birinshi kezeńde 90 atalymnan turatyn dári-dármek tańbalanady. Bul - farmasevtıka salasyndaǵy qaýymdastyqpen anyqtalyp, kelisilgen jáne Densaýlyq saqtaý mınıstrligi bekitken tizim. Mindetti sıfrlyq tańbalaý engizilgenge deıin dárihana sóresine túsken ónim jaramdylyq merzimi aıaqtalǵanǵa deıin satýǵa jatady. Jańa tártip 2023 jyldyń aıaǵyna deıin dárilik preparattardyń 100%-yn kezeń-kezeńmen tańbalaýdy kózdeıdi», - deıdi Sıfrlyq ekonomıkany damytý ortalyǵynyń bas dırektory Bıkesh Qurmanǵalıeva.
Mamandardyń aıtýynsha, otandyq dári-dármek óndirýshi iri jáne usaq kompanıalar pılotty negizde júıege daıyn. Al ımporttyq ónim óndirýshi eldegi zaýyttarda tańbalanady.
«Mindetti markalaýǵa jatatyn ónimde data matrıks kod bolmasa, onyń zańsyz ekenin bildiredi. Reestrge engizilmegen taýardan kúmándanýǵa bolady. Mobıldi qosymsha arqyly skanerlep, onyń naryqtaǵy ruqsat etilgen shekti baǵasyn da teksere alasyz. Qyrkúıek aıynda biz osy 90 atalym dári-dármekti tańbalaýdy bastaımyz. Iaǵnı Qazaqstan aýmaǵynda satýǵa ruqsat etilmegen preparattardyń aınalymyna tosqaýyl bolady. Bul - sizdiń tıisti baqylaýdan ótken sapaly dári-dármekke qol jetkizýińizge kepildik», - deıdi maman.