Qazaqstannyń tórt oblysy epıdemıalyq qaýiptiń «qyzyl» beldeýinde tur. Eldegi epıdahýal áli de turaqtana qoıǵan joq. QR DSM taratqan aqparat boıynsha, koronavırýsqa qarsy ekpeniń tolyq dozasyn saldyrǵandardyń jalpy sany 7 559 996 adam, ıaǵnı áli 50 paıyzdyq ımmýndaý kórsetkishine jete qoıǵan joq.
Covid-19 taralýyna jol bermeý jónindegi VAK-tyń málimetteri boıynsha, kovıdtik jaǵdaıdaǵy dúnıe júziniń ahýaly qandaı ekenine sholý jasap óteıik.
Brazılıa azamattary koronavırýsqa qarsy ekpe alýda belsendilik tanytýda. Jalpy alǵanda, ımmýndaýǵa jatatyn 182 mıllıon adamnyń 154 757 300-i kem degende ekpeniń bir dozasyn qabyldady, bul 12 jastan asqan halyqtyń 85% - yn quraıdy. COVID-19 vaksınasıasynyń tolyq kýrsynan 117 283 826 brazılıalyq ótti. Úshinshisi-býsterlik doza 8 683 554 turǵynǵa jetkizildi. Brazılıa medısınalyq agenttiginiń málimetinshe, sońǵy 24 saǵat ishinde vaksınanyń 1 344 005 dozasy qoldanylǵan.
Ýkraınada koronavırýs boıynsha sanıtarıalyq-epıdemıologıalyq jaǵdaı kúnnen-kúnge nasharlaýda. Astanany qosa alǵanda «qyzyl» aımaqtaǵy óńirler- 15 oblys. Bir kúnde Kıevte ınfeksıa juqtyrýdyń sany úsh jarym esege ósti. Densaýlyq saqtaý mınıstrliginiń málimetinshe, ótken aptada aýrýhanaǵa jatqyzylǵandardyń 93% - y vaksınasıalanbaǵan. Qazir Ýkraınada eresek turǵyndardyń tek 18% - y ǵana vırýsqa qarsy egilgen. Vaksınasıasyz nemese teris PTR testisiz, olar qazir esh jerde, tipti qoǵamdyq kólikte de júre almaıdy. Karantındi buzǵany úshin 34 myń grıvenge deıin aıyppul salynady. Bıliktiń habarlaýynsha, Kıevtegi lokdaýn jeltoqsanǵa deıin sozylýy múmkin.
Bir aı buryn epıdahýaly turaqty bolǵan Danıada da covid-19 jaǵdaılarynyń ósýi baıqalýda. Sońǵy eki aptada aýrýhanaǵa jatqyzylǵan naýqastar sany eki esege ósti. Ótken aptada 11 369 jańa covid-19 oqıǵasy tirkeldi, bir apta buryn 4 751 derek esepke alynǵan bolatyn. Úkimet Densaýlyq saqtaý mınıstri Magnýs Haınıkpen birge arnaıy komısıa qurdy, bul jumysshy top kúrdelengen jaǵdaıdy retteý baǵytynda sharalar qabyldaıtyn bolady. Mysaly, koronavırýstyń taralýyn báseńdetý úshin elde jańa shekteýler nemese basqa sharalar engizýdi usynýy múmkin.
Bahreın Koróldiginiń bıligi shuǵyl túrde 5-11 jas aralyǵyndaǵy 19 balany covid-19 ınfeksıasyna qarsy vaksınalaýǵa ruqsat berdi. Profılaktıkalyq preparat retinde Pfizer vaksınasyn qoldanýǵa ruqsat etiledi. Bahreınniń ulttyq densaýlyq saqtaý basqarmasynyń túsindirmesine sáıkes, sheshim 3 100 balanyń qatysýymen ótken tájirıbeden keıin qabyldandy. Zertteý nátıjeleri boıynsha vaksına 90,7% jaǵdaıda tıimdi ekendigi belgili boldy. Qazirgi ýaqytta elde koronavırýstan ımmýndaý prosesine 1 mıllıonnan astam adam tartylǵan. I dozany halyqtyń 1 177 889 nemese 66,17% aldy, 1 142 016 azamat egýdiń tolyq kýrsynan ótti.