Qazaqstannyń barlyq óńiri «jasyl» aımaqta, eldegi epıdahýal turaqtandy.
Almaty-akshamy.kz COVID-19 taralýyna jol bermeý jónindegi VAK-tyń telegram kanaly taratqan aqparattar negizinde dúnıe júzindegi kovıdtik jaǵdaıǵa sholý jasaıdy.
Sońǵy táýlikte Fransıada koronavırýs ınfeksıasynyń 18 853 jaǵdaıy anyqtaldy, COVID-19 vırýsy saldarynan 162 adam qaıtys boldy. Qazirgi ýaqytta Fransıa aýrýhanalarynda COVID-19 juqtyrǵan 20 925 naýqas bar. Reanımasıada 1826 adam emdelýde, bir kún buryn olardyń sany 1855 boldy. Alaıda, eldiń Densaýlyq saqtaý mınıstrligi koronavırýstyq indet kórsetkishteri tómendeıdi dep sanaıdy.
Qytaıda koronavırýs shtamynyń jańa órshýi týraly jańalyqtar birneshe kún boıy álemdi dúr silkindirdi. Ǵalymdar men dárigerler Qytaıda koronavırýstyń jańa órshýi «omıkron» VA.2. shtamymen baılanysty dep málimdeıdi. Alaıda, "Rospotrebnadzor" basshysy Anna Popova COVID-19 vırýsynyń bul shtamy Reseıde aqpan aıynyń basynda anyqtalǵandyǵyn málimdedegen edi. Ol Máskeýde, Bashkırıada jáne Marı Elde keń taralǵan.
Reseıdiń Densaýlyq saqtaý mınıstri Mıhaıl Mýrashko el turǵyndaryn kóktemniń alǵashqy aılarynda COVID-19 vırýsyna qarsy qaıta vaksınalaýǵa shaqyrdy. «Naýryz ben sáýir aılarynyń epıdemıologıalyq jaǵdaıdy odan ári damytýdaǵy mańyzy erekshe, sondyqtan bul ýaqytty revaksınasıa úshin qoldanǵan durys», - dedi Mýrashko. Qazirgi ýaqytta koronavırýsqa qarsy vaksınasıa jáne revaksınalaý Reseıdiń barlyq aımaqtarynda júrgizilýde. Elde «Spýtnık V» jáne «Spýtnık Light» preparattarynan basqa, SARS-CoV-2 vırýsyna qarsy «KovıVak», «EpıVakKorona-N» preparattary da qoldanylady. 24 qarashadan bastap jasóspirimderge arnalǵan alǵashqy otandyq vaksına - «Gam-KOVID-Vak M» ekpesi tirkeldi.
Izraılde «omıkronnyń» modıfıkasıalanǵan genomdyq nusqasy anyqtaldy. Shetelden oralǵan eki jolaýshyda koronavırýstyń shtamy tirkeldi, dep habarlaıdy eldiń Densaýlyq saqtaý mınıstrligi. «Elge kelgen kezde jolaýshylarǵa júrgizilgen PTR testileri «omıkron» nusqasy men onyń BA.2. qosalqy túriniń úılesimin anyqtady,» - delingen resmı málimdemede. Jolaýshylarda jeńil qyzba jáne bas aýrýy baıqalǵan, olardyń eshqaısysyna arnaıy medısınalyq kómek qajet bolmady. Alaıda, koronavırýstyń jańa nusqasynyń órshýi aıasynda vırýsologtar saqtyq sharalaryn álsiretpeý kerek dep sanaıdy.