Keshendi jumystar qolǵa alyndy.
Qazaqstan Úkimetiniń músheleri qazaqstandyq áýe kompanıalarynyń eýropalyq «qara tizimge» enbeıtinine senimdi. Sebebi arnaıy sheshim shyqqan, dep habarlaıdy Almaty-akshamy.kz.
«2022 jylǵy 1 maýsymda Eýropalyq komısıanyń Ushý qaýipsizdigi jónindegi komıteti elimizdiń avıasıalyq bıligi men qazaqstandyq áýe tasymaldaýshylardyń Eýropaǵa ushýyna qatysty resmı sheshimin jarıalady. Bul týraly Indýstrıa jáne ınfraqurylymdyq damý mınıstri Qaıyrbek Óskenbaev aıtty», - delingen atalmysh mınıstrliktiń baspasóz qyzmetiniń habarlamasynda.
Mınıstrdiń aıtýynsha, Eýropanyń 27 memleketiniń bıligi otandyq áýe tasymalymen aınalysatyn kompanıalarǵa kári qurlyqqa ushýǵa shekteý qoımaıtyny jaıynda sheshim qabyldaǵanyn jáne elimizdiń «qara tizimge» enbeıtinin atap ótti.
«Eýropalyq sarapshylar Qazaqstandaǵy ushý qaýipsizdigi salasynda qalyptasqan ahýal men osy turǵyda sońǵy 3 jylda el Úkimeti tarapynan qabyldanǵan sharalardy oń baǵalady. Árıne, biz buny úlken jetistik dep sanaımyz. Oǵan sebep te joq emes. Eýropalyq mamandar tarapynan oń baǵa alý úshin kóp kúsh-jiger jumsalyp, keshendi jumystar qolǵa alyndy», – dep atap ótti Qaıyrbek Óskenbaev.
Sondaı-aq ol Qazaqstannyń buǵan deıin «qara tizimge» kirgenin de eske saldy. Atap aıtqanda, 2009 jyly Halyqaralyq azamattyq avıasıa uıymy tarapynan júrgizilgen aýdıt nátıjesinde elimizdegi áýe tasymaly salasynda HAAU talaptarynyń saqtalý kórsetkishi tómen ekendigi anyqtalǵan (47 paıyz). Osyǵan oraı Eýrokomıssıa Air Astana kompanıasynan ózge qazaqstandyq áýe tasymaldaýshylarǵa Eýropa elderine ushýǵa tyıym salǵan bolatyn.
«Týyndaǵan jaǵdaıdan shyǵý úshin 7 jyldaı ýaqyt qajet boldy. 2016 jyly shekteýler alynyp tastalǵannan keıin osyndaı olqylyqty jaıttardyń aldaǵy ýaqytta qaıtalanbas úshin IIDM óte aýqymdy jumystar jasady», – dedi vedomstvo basshysy.
Onyń aıtýynsha, saladaǵy oń ózgerister – túbegeıli reformanyń nátıjesi. Júrgizilgen júıeli jumystar elimizdiń azamattyq avıasıa bıliginiń eýropalyq úlgige ótýine tikeleı yqpal etken. Bul úshin Úkimet pen mınıstrlik keshendi sharalardy qolǵa alyp, zańnamany jetildirý baǵytynda orasan zor jumystardy iske asyrdy. Nátıjesinde Ulybrıtanıanyń avıasıalyq ákimshiligimen (UKCAA) yntymaqtastyq ornatylyp, nátıjesinde Qazaqstannyń avıasıalyq ákimshiligi quryldy. Bul uıym 2019 jyldan beri azamattyq avıasıa salasyndaǵy baqylaý men qadaǵalaýdy júzege asyrýda. Basqarýdyń bul úlgisi damyǵan memleketterde keńinen qoldanylady jáne Halyqaralyq azamattyq avıasıa uıymy men EASA tarapynan maquldanǵan.
«Júrgizilgen reforma óz tıimdiligin ótken jyldyń tamyz aıynda tolyqqandy dáleldedi. Sebebi, Halyqaralyq azamattyq avıasıa uıymy júrgizgen aýdıt qorytyndysy boıynsha Qazaqstandaǵy ushý kezindegi qaýipsizdik deńgeıi 84 paıyzǵa deıin artqany aıqyndaldy. Bul álemdik ortasha kórsetkishten 15 paıyzǵa joǵary. Saraptama nátıjesi boıynsha elimiz Nıderlandy, Belgıa, Portýgalıa, Danıa jáne Islandıa memleketterimen bir satyda tur», – dedi IIDM basshysy.
«Bek Eır» ushaǵynyń apatyna oraı ótken jyldyń sońynda Eýrokomıssıa Qazaqstandaǵy ushý qaýipsizdigi boıynsha qalyptasqan jaǵdaıǵa alańdaýshylyq bildirdi.
«Otandyq avıasıa salasyn jańa shekteýlerden qorǵaý maqsatynda Eýropalyq komısıaǵa túzetý is-sharalarynyń jańa josparyn usyndyq. Sondaı-aq IIDM-nyń Syrtqy ister mınıstrligi jáne Qazaqstannyń Belgıadaǵy elshiligimen birlesip júrgizgen turaqty kelissózderiniń nátıjesinde komısıaǵa otandyq áýe tasymalynyń áleýeti men ondaǵy qaýipsizdikti dáleldedik», – dedi mınıstr.
Qazaqstan tarapynan keltirilgen dálelder maquldanyp, Eýropalyq komısıanyń ushý qaýipsizdigi jónindegi komısıasy túzetý sharalaryn oń baǵalaǵan. Bul óz kezeginde otandyq avıakompanıalardy «qara tizimge» enýin boldyrmaýǵa septigin tıgizdi.
Qaıyrbek Óskenbaevtyń paıymdaýynsha, der kezinde qolǵa alynǵan sharalar Qazaqstannyń ushý qaýipsizdigi boıynsha aımaqtaǵy kóshbasshylyq pozısıasyn saqtap qalýǵa yqpal etken.
Sonymen qatar ońtaıly sheshimder men júıeli jumystar sheteldik áýe kompanıalaryn tartýǵa jáne otandyq áýe tasymaldaýshylardyń ushý geografıasy aýqymyn ulǵaıtýǵa óz áserin tıgizedi.