Almaty ákimi Erbolat Dosaev almatylyqtardy Qala kúnimen quttyqtady
Qurmetti almatylyqtar, qala meımandary!
Men búgin sizderdi qala Kúnimen quttyqtaýǵa shyn júrekten rızamyn! Bul barlyǵymyz úshin, ár almatylyq úshin erekshe mereke!
Almaty – asa baı tarıhy, erekshe mádenıeti jáne tań qaldyratyn kórkem tabıǵaty bar ǵajap ári biregeı qala.
Bizdiń shahar elimizdiń rýhanı jáne mádenı ortalyǵy, Qazaqstan Táýelsizdiginiń altyn besigi bolyp tabylatyn erekshe meken. Almaty tarıhyna kóz salsaq, ol ár ýaqytta ǵalymdarǵa, aqyndarǵa, mýzykanttar men sáýletshilerge shabyt bergen. Osy uly tulǵalar qalamyzda turyp, óz shyǵarmalaryn ómirge ákelip, shahar kelbetin árlendirip, janyn salyp, Almatynyń erekshe mádenı kodyn jasaqtap keldi.
Áıgili klasık Remark «Eń ǵajap qala – ol adamnyń baqytty bolǵan jeri» depti. Men osynda týyp-óstim, eń jyly estelikterim osy qalamen baılanysty. Munda shańyraq qurdym, balalarym ósip keledi.
Siz ben bizdiń súıikti qalamyz – shynymen jandy qala, erekshe energetıkaǵa baı shahar. Qalamyz jaıly myńdaǵan arnaý jazyldy, áserli ánder shyrqaldy, jasyl jelekti ádemi kórinisin beınelegen sansyz sýretter salyndy.
Almaty tarıhynda ózge iri qalalardyń tarıhyndaı gúldený men quldyraý (tómendeý) kezeńderi jáne zor qýanysh pen úlken qaıǵy sátteri boldy. Qańtardyń qaıǵyly oqıǵalary bizdiń sanamyzdy múlde ózgertti. Biz qorshaǵan álemniń qanshalyqty názik ekenin túsindik jáne bereke degen baılyqty baǵalap, ony kúızelis pen zulymdyqtan saqtaýdyń mańyzyna kóz jetkizdik. Almaty Fenıks qusy sıaqty qaıta túlep, búgin onyń belsendi damýyn jáne qarqyndy alǵa jyljýyn kórip otyrmyz.
Almaty rýhyn qalpyna keltirý – ol birinshi kezekte qalanyń ár turǵynynyń jeke úlesi men róli bolyp tabylady. Bizdiń súıikti qalamyzdyń eki mılıonnan astam azamattarynyń zor jasampaz energıasy, kreatıvtiligi, eńbekqorlyǵy men óz qalasyna degen súıispenshiligi – bul bizdiń turaqty jáne nyq damýdyń berik negizi.
Bizde Almatyny damytý boıynsha úlken maqsat pen mindetter bar. Barlyǵymyz birge qalamyzdy odan ári kórkeıtýge atsalysýymyz kerek. Basty maqsat – jaıly qalalyq orta qurý jáne megapolıstiń barlyq aýdan turǵyndarynyń tabysyn arttyrý. Biz osy aptada qabyldanǵan «Almaty qalasynyń 2025 jylǵa deıingi damý baǵdarlamasy jáne 2030 jylǵa deıingi orta merzimdi perspektıvalaryn» tıimdi júzege asyrýǵa mindettimiz. Buǵan barlyq kúsh-jigerimizdi, tájirıbemiz ben bilimimizdi jumsaımyz.
Almatynyń barlyq turǵynyna shyn júrekten móldir mahabbat pen zor densaýlyq tileımin! Bizdiń Almaty kórkeıip, gúldene bersin!