Arnaıy reestrge engizilgen derek kez kelgen qazaqstandyqqa qoljetimdi bolady jáne qarjy jymqyryp, para bergenderge qoǵamdyq baqylaý kúsheımek.
Bul jaıynda Tashkentte ótken Ortalyq Azıanyń jemqorlyqqa qarsy platformasyn qurý jónindegi jıynda málim boldy. Konferensıany Birikken Ulttar Uıymyńyń óńirlik ókildigi uıymdastyrdy. Basqosý barysynda Qazasqtannyń keıingi birer jylda 2 mlrd dollardyń aktıvin qaıtarǵany erekshe atap ótildi, dep habarlaıdy Almaty-akshamy.kz.
24.kz málimetinshe, Bul isti elimizdiń sybaılas-jemqorlyqqa qarsy agenttigi Ortalyq Azıa jáne eýropalyq áriptesterimen qarqyndy túrde júrgizýdi josparlap otyr. Ol úshin arnaıy kelisimder jasalmaq. Qaıtarylǵan qarjy keıin elde áleýmettik máselelerdi sheshýge jumsalady. Qazirdiń ózinde 150 mlrd teńge jańa mektepter salýǵa bólindi. Kórshiles keı memleketter, onyń ishinde Ózbekstannyń shetel asqan aktıvterdi qaıtarý tájirıbesi bar. Taraptar osy baǵytta aqparat almasýǵa nıetti.
Jiger Baıdildın, QR SJQİQA 1-qyzmet basshysynyń orynbasary: - Bul jumystyń bári júrgizilip jatyr. Buryn bolǵanymen, Konstıtýsıalyq quqyqty buzbaý úshin olardy jarıa etýge jatpaıtyn málimetter bolatyn. Biraq qazir qoǵam tarapynan baqylaýdy kúsheıtý maqsatynda jumystar júrgizilip jatyr.
«Konferensıada Ortalyq Azıa elderiniń urlanǵan aktıvti qaıtarý tájirıbesi keńirek talqylandy. Qazaqstandyq organdar bul isti jedel ári tıanaqty atqaryp jatyr. Birikken Ulttar Uıymy ony joǵary baǵalaıdy. Endi aımaqtaǵy memleketter bir-birimen áriptestikti arttyryp, urlanǵan qarajatty anyqtaý, qaıda baǵyttalǵanyn baqylaýǵa múmkindik alýy kerek. Ortalyq Azıa osy baǵytta bir platformaǵa birikse deımiz», - deıdi BUU Ortalyq Azıa boıynsha óńirlik ókili Ashıta Mıttal.