Álem chempıonaty 20 mamyrda máresine jetedi
Bokstan áıelder arasyndaǵy álem chempıonatynda búgin qazaqstandyq eki boksshy alǵashqy jekpe-jeginde jeńiske jetti, dep habarlaıdy Almaty-akshamy.kz QazAqparat-qa silteme jasap.
Túrkıanyń Ystanbul qalasynda ótip jatqan álem chempıonatynda el quramasynan Jaına Shekerbekova (52 keli) Pýerto-Rıko elinen kelgen Melodı Vargasty aıqyn basymdyqpen jeńdi. Sondaı-aq, taǵy bir qazaqstandyq Karına Ibragımova (57 keli) rýmynıalyq Klaýdıa Nechıtany tize búktirdi. Búgin taǵy eki boksshymyz sharshy alańǵa shyǵady. Aldymen kúndizgi sesıada Aıda Ábikeeva (63 keli) aljırlik Imane Helıfpen qolǵap túıistiredi. Al keshki sesıada Nadejda Rábes (75 keli) túrkıalyq Býshra Ishıldarmen kezdesý ótkizedi. Eske salsaq, budan buryn el quramasynan Valentına Halzova (70 keli) kenıalyq Lorna Kýsa Sımbıden, Alýa Balqybekova (48 keli) kanadalyq Prıanka Dıllonnan basym tústi. Sondaı-aq, dúbirli dodada elimizdiń atynan Nazym Qyzaıbaı (50 keli), Jaına Shekerbekova (52 keli), Dına Jolaman (54 keli), Karına Ibragımova (57 keli), Rımma Volosenko (60 keli), Aıda Ábikeeva (63 keli), Darıǵa Shákimova (66 keli), Nadejda Rábes (75 keli), Gúlsaıa Erjan (81 keli) jáne Lázzat Kúngeıbaeva (81 keliden joǵary) synǵa túsedi.