Álemge Qazaqstan atyn áıgilegen, elge osyndaı syılyqty tanytqan qazaqtyń qara balasy - Imanbek Zeıkenov.
Elimizdiń atyn halyqaralyq arenada tanytyp júrgen qazaqstandyqtar jaıly aıdarymyzdy jalǵastyramyz.
Gremmı jyl saıyn Amerıkanyń Óner jáne dybys jazý ǵylymy ulttyq akademıasy (NARAS) taǵaıyndaıtyn mýzykalyq premıa. Bul syılyq akademıanyń belsendi músheleriniń daýys berý nátıjesi boıynsha taǵaıyndalady. Olardyń qatarynda ártister, mýzykanttar, prodúserler, stýdıalyq dybys rejıserleri jáne álemniń dybys jazý salasyndaǵy maıtalmandar bar. Osylaısha, Gremmı mýzykalyq ındýstrıanyń eń joǵary marapaty bolyp tabylady, bul ony konseptýaldy túrde kınodaǵy Oskarmen jáne televızıa salasyndaǵy Emmımen baılanystyrady.
«Gremmı» syılyǵyn alǵan mynadaı belgili adamdar men mýzykalyq toptar bar: Frenk Sınatra, The Beatles, The Rolling Stones, Stıng, Elvıs Preslı, Djon Lennon, Tına Terner, Djordj Benson, Bı Bı Kıng, Bob Dılan, Ýıtnı Húston, Madonna, Beıonse, Rıanna. Dırıjer Georg Sholtı 31 ret (rekord), «U2» toby 22 ret, Maıkl Djekson 13 ret alǵan eken. |
Al bizdiń elimizdiń búgingi tarıhynda tuńǵysh Grammy syılyǵyn Pavlodar óńiriniń týmasy Imanbek Zeıkenov ıelendi.
Onyń nusqasynda sheteldik oryndaýshynyń ánine jazylǵan remıks tórt aı boıy álemdik mýzyka chartynyń úzdik ondyǵynan túspedi. Bul qarapaıym temirjolshy qazaq jigitiniń óz atyn ǵana emes, elimizdi óner salasynda tanytqan, kópshilikti tańdandyrǵan keremet jetistigi boldy.
Imanbek Zeıkenov 2000 jyly 21 qazanda Pavlodar qalasynan 50 shaqyrym jerdegi Aqsý qalasynda dúnıege kelgen. Sol jerde ósip-óngen. Imanbek 8 jasynda alǵash ret ákesi syılaǵan gıtarada oınaǵan. Temirjol ınstıtýtynda oqyp júrgende, ol Aqsý temirjol stansıasynda jumys isteı bastady. Birneshe jyl «Qazaqstan Temir Joly» AQ-nyń Aqsýdaǵy bólimshesinde belgi berýshi bolyp jumys istedi. Al mýzyka onyń bala kúninen bergi hobbıi, Imanbektiń arnaıy mýzykalyq bilimi joq. Gıtara tartýdy ákesi úıretse, mýzyka jasaýdy óz betinshe YouTube jelisindegi vıdeolardy qaraı otyryp úırengen.
Grammy syılyǵyna usynylǵan remıksti jas talant nebári 2 saǵattyń ishinde jazyp shyqqan.
Aıta keteıik, Imanbek mundaı marapatqa usynylǵan alǵashqy qazaqstandyq. Búginde onyń 50-ge jýyq týyndysy bar.
Álemdik mýzyka baǵytyndaǵy aıtýly syılyqtardyń biri Grammy («Gremmı») júldesiniń 63-inshi saltanatty marapattaý rásimi jahandyq pandemıaǵa baılanysty onlaın ótken bolatyn. Zeıkenovtiń amerıkalyq reper Saint Jhn-nyń «Roses» kompozısıasyna (2016) arnap 2019 jyly jasaǵan remıksi úzdikter qatarynda ataldy. Kóptegen mýzykalyq pablıkterde amerıkalyq oryndaýshynyń kompozısıasyna jazylǵan onyń «Eń úzdik remıks» nomınasıasynyń jeńip alǵan týyndysy bul ánniń alǵashqy nusqasynan áldeqaıda utymdyraq shyǵyp, oǵan ekinshi ómir syılaǵanyn jáne tanymal bola túsýine jol ashqanyn jarysa jazyldy.
Onyń shyǵarmasy «hıt» bolǵanyn trektiń «Billboard Hot 100» úzdik ondyǵynda 4 aıdaı turdy. Remıks Apple Music-tiń TOR-10 qataryna kirdi, Shazam mýzykalyq qosymshasynda 22 mln qaralym jınap, uzaq ýaqyt boıy «Iandeks. Mýzyka» chartynda alǵashqy oryndy bermeı turdy.
Trek birneshe chartta, sonyń ishinde AQSH pen Ulybrıtanıada kósh bastap, The Weeknd, Dua Lipa, Billie Eillish, Roddy Ricch jáne Justin Bieber sıaqty ártisterden ozyq boldy.
«Ár mýzykanttyń mansap jolyndaǵy eń keremet sát – Grammy syılyǵyn alý. Biz osy jetistikke qol jetkizdik!» dep jazdy sol kezde Imanbek.
Gremmı júldesine ıe bolǵannan keıin kóp uzamaı ónerpaz Imanbek Rita Ora jáne David Guetta sıaqty álemge áıgili mýzykanttarmen birge án jazǵan.
Qazaqstandyq alǵashqy Greemı ıegeri jaıly amerıkalyq New York Times gazeti maqala jarıalaǵan.
«Meniń jetistigimniń jahandyq deńgeıge ıe ekenin túsinemin. Endi men «bir rettik ártis» emes ekenimdi dáleldeýim kerek», – dedi mýzykant The New York Times gazetine bergen suhbatynda.
Sonyń dáleli retinde qazaqstandyq dıdjeı Imanbek Zeıkenovtyń qorjynynda (Imanbek) Billboard Awards júldesin de kóp uzamaı ıelendi.
Imanbek Zeıkenov Saint JHN-nyń Roses ánine jasaǵan remıksi úshin «Úzdik elektron án» nomınasıasynda da marapatqa ıe boldy.
«Billboard Awards marapatyn aldym. Ol da Grammy sıaqty, taǵy bir syılyq qanjyǵada», degen bolatyn mýzykant.
Billboard Music Award – mýzykalyq charttardaǵy úzdik jetistikteri úshin amerıkalyq mýzykalyq baspa Billboard basylymy beretin mýzykalyq syılyq.
Gremmıden keıin juldyzy janǵan qarapaıym jigit bul júldesinen keıin osy syndy kóptegen reıtıńter men konkýrstarda aty atalyp, jaqsy jetistikterge jetip júr. Ol ártúrli elderdiń juldyzdarymen birlesip, sansyz jumystar jasap júr.
Byltyr Imanbek-tiń týyndysy 1 mlrd márte tyńdalǵany úshin Spotify syılyǵyna laıyq dep tanylǵan bolatyn.
Odan bólek, qazaqstandyq dıdjeı Imanbek Zeıkenov Reseıdiń GQ jýralynyń jyl saıynǵy syılyǵynda «Jyl jańalyǵy» atalymynda jeńiske jetti.
Osylaı mýzykaǵa degen súıispenshiliginiń arqasynda bir-aq kúnde tanylǵan Imanbektiń fotosy bıyl naýryzda Nú-Iorktegi Taıms-skver ǵımaratynyń ekranyna shyqty. Imanbek Zeıkenov bul týraly óziniń Instagram paraqshasynda Taıms-skver ǵımaratynyń ekranyna shyqqan sýreti úshin eki dybys jazý stýdıasyna alǵys bildirdi. Bul onyń amerıkandyq mýzykant Trevor Denıelmen birlesip jumystanǵan jańa treginiń jarnamasy.
Al biz óz kezegimizde elimizdiń jaqsy ımıjin qalyptastyrýda úlesin qosyp júrgen jigittiń shyǵarmashylyǵyna shabyt, áli de kóptegen jetistikterge jetýine tilektespiz!