Bıyl zańnamadan bıznes úshin 10 myń kereksiz talap alynyp tastalady. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Úkimet basshysy Álıhan Smaıylov aıtty, dep habarlaıdy Almaty-akshamy.kz QazAqparatqa silteme jasap.
Premer-Mınıstr qazirgi ýaqytta respýblıkada bızneske qatysty kásipkerlik qyzmet salasynda jańa retteýshi saıasat engizilip jatqanyn atap ótti. Qańtar aıynan bastap mindetti talaptar reestri ashyq túrde jarıalandy.
«Endi reestrde joq talaptar boıynsha tekserýler júrgizilmeıdi. Bıyl zańnamadan bıznes úshin 10 myń kereksiz talap alynyp tastalady. Bul tekserýlerdiń sanyn edáýir qysqartady. Sondaı-aq osy jyldyń sońyna deıin táýekelderdi basqarý júıelerin avtomattandyrý tolyǵymen aıaqtalady», – dedi Premer-Mınıstr.
Onyń aıtýynsha, bıyl shaǵyn jáne orta bıznesti júıeli túrde qoldaý sharalary keńeıtildi. Óńdeý ónerkásibin damytý maqsatynda qoldaý kórsetiletin qyzmet túrleriniń tizbesi (jeńildetilgen nesıeler jáne qarjylyq lızıń) 116-ǵa ulǵaıdy. Birqatar basym qyzmetter boıynsha prosenttik mólsherlemeni sýbsıdıalaý merzimi 5 jyldan 7 jylǵa deıin uzartyldy.
Bıznestiń jol kartasyn qarjylandyrý kólemi 224 mlrd teńgege deıin ulǵaıdy. Shaǵyn jáne orta bıznesti qoldaý aıasynda bıyl 20 myńnan astam jobany sýbsıdıalaý, 18 myńnan astam jobaǵa kepildik berý kózdelip otyr. Orta bıznesti qoldaý boıynsha qosymsha sharalar qabyldanady.