Bul týraly Úkimet otyrysynda Indýstrıa jáne ınfraqurylymdyq damý mınıstri Qaıyrbek Óskenbaev turǵyn úı saıasatyndaǵy jańa tásilder týraly aıtyp berdi, dep habarlaıdy almaty-akshamy.kz baq.kz silteme jasap.
Mınıstr atap ótkendeı, 2021 jyldyń qorytyndysyna sáıkes, respýblıka boıynsha 17,1 mln sharshy metr jańa turǵyn úı salyndy. Iaǵnı 151 myń azamat turǵyn úı jaǵdaılaryn jaqsartty.
Turǵyn úı qurylysyna ınvestısıalar byltyrǵy jyldyń tıisti kezeńimen salystyrǵanda 19,1%-ǵa ósip, 2,4 trln teńge boldy. Bıyldan bastap «sharshy metr qurylysynan» jaıly ómir súrý ortasyn qalyptastyrýǵa kóshýdi josparlap otyrmyz. Oǵan jer resýrstaryn tıimdi paıdalaný, kóshe-jol jelisin damytý jáne qoǵamdyq keńistikterdiń sapasyn arttyrý esebinen jınaqy jáne alýan túrli qurylys salý arqyly kóshemiz, - deıdi Qaıyrbek Óskenbaev.
Azamattardyń turǵyn úı máselelerin sheshýdiń negizgi tásilderi sýbsıdıalar, turǵyn úıdi jalǵa alýǵa arnalǵan turǵyn úı tólemderi, qurylys salýshylardan daıyn turǵyn úı satyp alý, eski kvartaldardy renovasıalaý, problemalyq obektilerdi aıaqtaý arqyly memlekettik qoldaýdyń jańa tetikteri bolady.
Osyny eskere otyryp, bıylǵy jylǵa turǵyn úıdi iske qosýdyń jyldyq kólemin 17 mln sharshy metr dep belgileýdi usynamyz, - dep aıtty ol Úkimet otyrysynda.