Bul týraly Úkimet otyrysynda Indýstrıa jáne ınfraqurylymdyq damý mınıstri Qaıyrbek Óskenbaev qurylys salasynda mınıstrliktiń atqaryp jatqan jumystary jónindegi baıandamasynda aıtyp berdi, dep habarlaıdy Almaty-akshamy.kz BAQ.KZ tilshisine silteme jasap.
Búgingi kúni qurylys salasynda 46 476 kásiporyn jumys isteıdi, jumyspen qamtylǵandar - 641 myń jumysker men maman. Biz jumys oryndaryn saqtaý jáne ulǵaıtý jónindegi saıasatty odan ári jalǵastyramyz. Budan basqa, bizdiń mınıstrliktiń negizgi maqsattary - turǵyn úıdiń qoljetimdiligin qamtamasyz etý, onyń qunynyń qymbattaýyna jol bermeý jáne halyqtyń ómir súrý sapasyn arttyrý, - dedi ol.
Onyń sózinshe, turǵyn úı jáne qurylys materıaldary qunynyń qymbattaýyna jol bermeý úshin mınıstrlik úsh baǵytta jumys júrgizip jatyr.
Birinshisi, qurylys salasyn sıfrlandyrý. Ekinshisi, baǵa belgileý júıesin jetildirý jáne qurylystaǵy baqylaýdy kúsheıtý. Úshinshisi, qurylys materıaldary óndirisin damytý. Qurylys salasyn sıfrlandyrý boıynsha júıe - Aqparattyq modelderdiń memlekettik banki engizilip jatyr, ol qurylys obektilerin onlaın formatta, onyń ishinde aqparattyq modeldeý tehnologıalaryn qoldana otyryp modeldeýge múmkindik beredi, - dep aıtty Qaıyrbek Óskenbaev.
Aıtýynsha, «E-Qurylys» júıesi onlaın-rejımde qazanshuńqyr qazýdan bastap paıdalanýǵa berýge deıingi barlyq kezeńdegi qurylys prosesin baqylaýǵa múmkindik beredi.
Úlestik qatysý sharttaryn esepke alý úshin «Qaztizilim» engizildi. Ol josyqsyz qurylys salýshylardan úlestik qurylys boıynsha turǵyn úı satyp alý qaýip-qaterin barynsha azaıtady. Marketpleıs onlaın-platformasynda naryqta kompanıalar qurylys materıaldaryn óndirýshilerden deldalsyz tikeleı satyp ala alady. «E-SHańyraq» platformasy turǵyn úı-kommýnaldyq sharýashylyq sýbektileriniń biryńǵaı júıesi bolyp tabylady jáne turǵyn úı qoryn basqarýdyń ashyqtyǵyn, turǵyn úı-kommýnaldyq sharýashylyq salasyna monıtorıń pen taldaýdy qamtamasyz etedi, - deıdi IIDM basshysy Úkimette jasaǵan baıandamasynda.
Sózinshe, salany sıfrlandyrý boıynsha qabyldanyp jatqan sharalar búrokratıany tómendetedi jáne qurylystaǵy rásimderdi jeńildetedi.