Fransýz Respýblıkasynyń baqylaýshysy Almatyda saılaý prosesi shtattyq rejımde ótip jatyr dep esepteıdi
Almaty qalasy boıynsha QR prezıdentin saılaýdy jarıalaý jónindegi baspasóz ortalyǵynyń alańynda baqylaýshy, Fransıa Respýblıkasynyń senatory, Eýropalyq ister jónindegi turaqty komıtet tóraǵasynyń orynbasary, Zańnama jónindegi turaqty komıtettiń hatshysy Andre Marsel Reıshardyń qatysýymen baspasóz konferensıasy ótti, dep habarlaıdy Almaty-akshamy.kz.
«Qazaqstan Eýropalyq Odaqtyń qyzyǵýshylyǵyn týdyrady, óıtkeni Reseı Federasıasy men Qytaı Halyq Respýblıkasy sıaqty iri eldermen kórshiles ornalasqan», - dedi spıker.
Andre Marsel Reıshar Qazaqstan qazir damýdyń óte mańyzdy kezeńinen ótip jatqanyn atap ótti.
«Prezıdent Toqaev saılaý ótkizýdi qamtamasyz etý boıynsha qajetti sharalar qabyldady. Ol óziniń Jol kartasyn – ádil Qazaqstandy damytýǵa jáne qurýǵa baǵyttalǵan baǵdarlamany usyndy jáne saılaý quqyǵynyń tolyq saqtalýyn qamtamasyz etýge nıet bildirdi. Qazir Qazaqstan halqy daýys berý arqyly eldiń bolashaǵy týraly óz sheshimin qabyldaýda», - dep atap ótti spıker.
Andre Marsel Reıshar tańerteń Almatydaǵy tórt saılaý ýchaskesine baryp úlgergenin, tústen keıin taǵy sonsha saılaý ýchaskesine barýdy josparlap otyrǵanyn habarlady. Spıkerdiń aıtýynsha, ol osydan keıin ǵana tolyq pikir qalyptastyra alady.
«Men saılaý prosesiniń ótýin qalypty dep baǵalaımyn, bári qalypty rejımde júrip jatyr. Proses standartty bolyp tabylady: adam keledi, jeke kýálikti kórsetedi jáne jergilikti saılaý komısıasy ony saılaýshylar tiziminen tekseredi, sodan keıin ol qol qoıady, sodan keıin ǵana oǵan bir suraq bar búleten beriledi. Eger saılaýshynyń aty tizimnen tabylmasa, ol daýys bere almaıtyny óte mańyzdy. Eń bastysy, prınsıpti saqtaý úshin bári jasalýda: bir saılaýshy – bir daýys», - dedi spıker.