Kezdesýge batyrdyń anasy da qatysty
Oqý-aǵartý mınıstri Asqat Aımaǵambetov kóp qabatty úıdiń terezesinen qulaǵaly turǵan balany qutqaryp qalǵan elordalyq mektep túlegi Esdáýlet Dáýitbekovke bilim grantyn tabystady, dep habarlaıdy Almaty-akshamy.kz vedomstvonyń baspasóz qyzmetine silteme jasap.
«Joǵary bilim berý sapasymen tanymal jáne áleýmettik qoldaý kórsetýde belsendi pozısıany ustanatyn elimizdegi jetekshi joǵary oqý oryndarynyń biri – Narhoz ýnıversıtetine alǵysymyz sheksiz», - dedi Asqat Aımaǵambetov jas túlekke ýnıversıtette tegin oqýǵa grantty tabystap turyp.
Mınıstr Esdáýletke kórsetken qaısarlyǵy úshin alǵysyn bildirip, ózinen kishilerge kómek berýge jáne olardy qorǵaýǵa daıyn bolýy elimizdiń barlyq oqýshysy úshin úlgi-ónege ekenin atap ótti.
«Sizge kórsetken qaısarlyǵyńyz ben batyldyǵyńyz úshin alǵys aıtqym keledi. Siz oqýshynyń mektep qabyrǵasynan qalaı túlep ushýy kerek ekenin dáleldedińiz. Osyndaı asyl, batyr azamatty tárbıelegen ata-anańyz ben ustazdaryńyzǵa alǵys aıtamyn. Prezıdent búgin mektepterdegi býllıng faktilerine alańdaıtynyn aıtqan edi. Sizdiń búgingi erligińiz laıyqty úlgi bolady. Joǵary synyp oqýshylary da siz sıaqty kishkentaılardy qoldaýǵa jáne qorǵaýǵa árqashan daıyn bolady dep senemin», - dedi Asqat Aımaǵambetov.
Sondaı-aq, kezdesýge 17 jastaǵy batyrdyń anasy Ásemgúl Qabdyqalyqova da qatysty. Bul otbasy alty bala tárbıelep otyr.