Zańsyz taksı júrgizýshisine adamdarǵa tıisip, balaǵat sózder aıtqany úshin aıyppul salyndy.
Jyl basynan beri kólik polıseıleri eldegi áýe jáne temirjol kóligi obektilerinde túrli ákimshilik quqyqbuzýshylyqtar jasaǵany úshin 6 421 azamatty jaýapkershilikke tartty. Sonyń ishinde qoǵamdyq oryndarda tıiskeni úshin 387 tulǵa, onyń 101-i - zańsyz taksı júrgizýshisi, dep habarlaıdy Almaty-akshamy.kz Polisia.kz-ke silteme jasap.
Máselen, 14 aqpanda Astana stansıasyndaǵy jelilik polısıa basqarmasyna Qostanaı – Almaty-1 baǵytyndaǵy poıyz jolaýshysy shaǵymdandy. Onyń aıtýynsha, elordanyń temirjol vokzalynan shyǵa berisinde taksı júrgizýshileri mazasyn alyp tıisken, eskertýlerge qulaq aspaǵan, sondaı-aq balaǵat sózder aıtqan.
Tekserý kezinde polıseıler 45, 48, 50 jáne 51 jastaǵy jeti azamatty anyqtady, olardyń bireýi buǵan deıin adamdardyń mazasyn alyp, tıiskeni úshin ákimshilik jaýapkershilikke tartylǵan. Oǵan QR ÁQBtK-niń 449-baby 2-bóligi boıynsha 10 aılyq eseptik kórsetkish (34 500 tg) mólsherinde aıyppul salyndy. 6 quqyq buzýshyǵa qatysty QR ÁQBtK-niń 449-baby 1-bóligi boıynsha ákimshilik hattama toltyryldy.
Sonymen qatar, 45 jastaǵy er adam usaq buzaqylyq jasaǵany úshin QR ÁQBtK-niń 434-baby 1-bóligi boıynsha jaýapkershilikke tartylyp, oǵan 5 AEK (17 250 tg) mólsherinde aıyppul salyndy.
Esterińizge sala keteıik, qoǵamdyq oryndarda tıisý boıynsha ákimshilik jaza qoldanylǵannan keıin atalǵan fakti qaıtalanǵan jaǵdaıda 10 AEK mólsherinde aıyppul salýǵa nemese 5 táýlikke deıingi merzimge qamaýǵa alýǵa, al usaq buzaqylyq 5 AEK mólsherinde aıyppul salýǵa ne 10 táýlikke deıingi merzimge ákimshilik qamaýǵa alýǵa ákep soǵady.