Sabaqty tájirıbesi mol, bilikti mamandar júrgizedi.
Jetigen garnızonynda elimizdiń Áýe qorǵanysy kúshteri, Ulttyq qaýipsizdik komıteti jáne Ulttyq ulan áskerı bólimderiniń serjanttar quramy kýrstyq daıarlyqtan ótip jatyr, dep habarlaıdy Almaty-akshamy.kz.
«Kýrstyq daıarlyq Áýe qorǵanysy kúshteriniń kishi mamandaryn daıarlaıtyn biregeı oqý-jattyǵý ortalyǵynda uıymdastyrylyp otyr. Bul jerde kelisimshart boıynsha áskerı qyzmetshilerdi ınjenerlik-avıasıalyq qyzmet, ushýdy qamtamasyz etý quraldaryn paıdalaný jáne jóndeý, baılanys jáne radıotehnıka mamandyqtaryna oqytady»,- delingen Qorǵanys mınıstrliginiń baspasóz qyzmetiniń habarlamasynda.
Kýrstyq daıarlyqtyń maqsaty – áskerı qyzmetshilerdiń kásibı deńgeıin arttyryp, praktıkalyq daǵdylaryn jetildirý jáne dene daıarlyǵyn jaqsartý.
«Oqý prosesi Áskerı-áýe kúshteri men Áýe shabýylyna qarsy qorǵanys áskerleriniń kishi mamandaryn daıarlaıtyn eki mektepte 15 mamandyq boıynsha ótkiziledi. Oqý uzaqtyǵy bir jarym aı», – deıdi qyzmet bastyǵy – oqý-ádistemelik bólimniń oqytýshysy podpolkovnık Samǵat Kúshqalıev.
Oqý-jattyǵý ortalyǵynda jattyqtyrý keshenderi, zerthanalyq-oqý synyptary, áýe shabýylyna qarsy qorǵanys áskerleriniń ushý apparattary men tehnıkalarynyń modelderi bar. Mamandyǵy boıynsha praktıkalyq daǵdylardy pysyqtaýǵa múmkindik beretin tıisti materıaldyq-tehnıkalyq bazamen jabdyqtalǵan.
Sabaqty tájirıbesi mol, bilikti mamandar júrgizedi. Osy jyldar ishinde ortalyq úsh myńnan astam kishi býyn mamandaryn daıarlap shyǵardy.