Beınemonıtorıng júıeleriniń jelisin keńeıtý jobasy sheńberinde jańa mekenjaılar tizbesi jasalǵany týraly qala ákimi E.Dosaev Bostandyq aýdany turǵyndarymen kezdesýinde aıtty, dep habarlaıdy Almaty-akshamy.kz.
Qala boıynsha adamdar kóp jınalatyn jerlerde qosymsha 6000 kamera, onyń ishinde Bostandyq aýdany boıynsha 750 kamera ornatý josparlanǵan.
Kólik quraldaryn júrgizý tártibin arttyrý úshin qazirgi tańda aýdanda 102 «Sergek» aparattyq-baǵdarlamalyq kesheni, ıaǵnı 784 beınekamera jumys isteıdi. Sonymen qatar bıylǵy jyldyń birnishi toqsanynda 96 «Sergek» kesheni ornatyldy. Osylaısha, aýdanda «Sergek» keshenderiniń sany 198-ge, beınekameralar 1325-ke jetti, - dedi qala ákimi.