Órt shatyrdan shyqqan.
Atyraýlyq polıseıler órtke oranǵan kóp qabatty úıden 25 adamdy evakýasıalady, dep habarlaıdy Almaty-akshamy.kz.
QR İİM baspasóz qyzmetiniń habarlaýynsha, 5 mamyr kúni saǵat 19:32 shamasynda atyraýlyq polısıa qyzmetkerlerine 101 órt sóndirý arnasynan qala aýmaǵynda ornalasqan kóp qabatty páterlerdiń shatyry órtenip jatqandyǵy jóninde habarlama kelip túsken.
Atalǵan habarlama boıynsha polısıa maıory Qýanysh Bozaqaev pen polısıa kapıtany Erlan Myrzagereev atalǵan mekenjaıǵa 4 mınýtta jetken.
Keıin 9-shy qabatqa páter ıesimen birge jedel túrde kóterilip, turǵyndardy evakýasıalaýǵa kedergi keltirip qalyń qara tútin býdaqtap jatqan órtti óshirýge kirisken. Óıtkeni, shatyrdan shyqqan órt joǵary qabattaǵy páterlerdiń balkonyna ótip, páterler órtene bastaǵan. Qos polıseı qaýiptiń aldyn alýǵa árekettenip, der kezinde páterdegi órtti aýyzdyqtap, 25 turǵyndy evakýasıalap, qaýipsiz jerge shyǵardy.
Kóp qabatty úıdiń shatyryndaǵy tilsiz jaýdy órt sóndirýshiler 1 saǵat ishinde tolyq aýyzdyqtady. Zardap shekkender joq.