Bıyl jaısyz otbasy retinde esepke alynǵandar sany - 75.
Atyraýda bala tárbıesine baılanysty mindetterin oryndamaǵan 8 adam ata-ana quqyǵynan aıyrylýy múmkin, dep habarlaıdy Almaty-akshamy.kz QazAqparatqa silteme jasap.
Oblys ákiminiń orynbasary Jasulan Bısembıevtiń tóraǵalyǵymen ótken komısıa otyrysynda kámeletke tolmaǵandardyń quqyǵyn qorǵaý máselesi qaraldy. Onda Atyraý qalasynda jasóspirimder máselesi talqylandy.
«Byltyr komısıa otyrysynda ıývenaldy polısıa bólimi men bilim berý mekemeleriniń usynystary boıynsha 116 is qaraldy. Al, komısıanyń bıylǵy 8 otyrysynda 47 jasóspirimge qatysty iske taldaý jasaldy. Onyń ishinde kámeletke tolmaǵan 3 oqýshy uzaq ýaqyt boıy sabaqqa barmaǵany anyqtaldy. Komısıa oqýdan jaltarǵan jasóspirimderdi arnaýly mektepke ornalastyrýǵa baılanysty tıisti qaýlysy shyǵardy. Balalarynyń tárbıesi men bilim alýyna baılanysty ata-analyq mindetterin oryndamaǵany úshin 8 adamdy ata-ana quqyǵynan aıyrý týraly qaýly shyǵyp, sotqa jiberildi. Tórt jasóspirimge tártibin túzeý úshin synaq merzimi berildi. Úsh ata-ana oblystyq narkologıalyq dıspanserge 30 kún em qabyldaýǵa jatqyzyldy», - dep habarlady Atyraý qalasy ákiminiń orynbasary Nurjan Ermuhanov.
Onyń aıtýynsha, jaısyz otbasynda tárbıelenip, polısıa esebine alynǵan balalar qoǵamdyq tártipti buzýǵa, qylmys jasaýǵa beıim bolǵany anyqtalǵan. Byltyr jaısyz otbasy esebine alynǵandar sany – 94. Bıyl bul esepte 75 otbasy tur.
«Kámeletke tolmaǵandar máselesi jáne olardyń quqyǵyn qorǵaý jónindegi komısıa músheleri polısıa qymetkerlerimen birge aıyna eki ret jaısyz otbasylardyń turǵylyqty mekenjjaıyna tekserý júrgizedi. Eń bastysy, kámeletke tolmaǵan jasóspirimderdiń quqyǵyn buzbaý máselesine nazar aýdarylyp otyr», - dep málim etti Nurjan Ermuhanov.