Astanada 16-18 maýsym kúnderi dzúdodan álemdik Qazaqstan Barysy Grand Slam jarysy ótedi. Álemniń kil myqtylary jınalatyn doda elordadaǵy «Barys Arena» sport saraıynda ótkizilmek, dep habarlaıdy Almaty-akshamy.kz.
Qazaqstan dzúdo federasıasynyń baspasóz qyzmeti taratqan málimeti boıynsha halyqaralyq dzúdo federasıasynyń kúntizbesine «Qazaqstan barysy Grand Slam» ataýymen engen bul jarysqa barlyǵy 43 elden 344 sportshy qatysady. Qatysýshylardyń qatarynda Olımpıada chempıondary men júldegerleri Nora Gakova (Kosovo), Fabıo Bazıle (Italıa), Kısıkú Sarah (Fransıa), Gýram Týshýshvılı (Grýzıa), Van Daık Sannı (Nıderlandy), Odette Gúffrıd (Italıa), sondaı-aq álem chempıondary men júldegerleri Assýnto Skýtto (Italıa), Nemaná Maıdov (Serbıa), Beka Gvınıashvılı (Grýzıa), Kım Von Djın (Ońtústik Koreıa) bar.
Qazaqstan namysyn álem chempıonatynyń kúmis júldegeri Ǵusman Qyrǵyzbaev, álem chempıonatynyń qola júldegeri Abıba Abýjaqynova, birneshe álemdik Grand Slam jáne Gran-prı jarystarynyń jeńimpaz-júldegerleri Jansaı Smaǵulov, Nurqanat Serikbaev, Danıar Shamshaev, Ǵalıa Tynbaeva, Islam Bozbaev bastaǵan birqatar dzúdoshylar qorǵamaq.
Esterińizge sala ketsek, bul dodanyń nátıjesinde IJF erejelerine sáıkes jarystyń jeńimpazdary men júldegerleri arasynda Álemdik jáne olımpıadalyq reıtıńterde upaılar bólinedi. Atap aıtqanda, 1 oryn úshin 1000, 2 oryn úshin – 700, al 3 oryn úshin – 500 upaı esepteletin bolady.
«Qazaqstan barysy Grand Slam» týrnırinde dzúdoshylar 2024 jyly Parıjde ótetin Jazǵy Olımpıada oıyndaryna qatysý úshin upaı jınaıdy.
Qazaqstan dzúdo federasıasy men Halyqaralyq dzúdo federasıasynyń (IJF) ekijaqty kkelisimshartyna sáıkes, Qazaqstan álemdik Grand Slam jarysyn 2023-2026 jyldar aralyǵynda qabyldaıdy.
Úsh kúnge sozylatyn baıraqty básekege kirý tegin.
Jarys kestesi:
16 maýsym
Jarystyń bastalýy – 10:00
Ashylý saltanaty – 16:00
Fınaldyq beldesýler – 17:00
Áıelder: -48 kg, -52 kg, -57 kg
Erler: -60 kg, -66 kg
17 maýsym
Jarystyń bastalýy – 10:00
Fınaldyq beldesýler – 17:00
Áıelder: -63 kg, -70 kg
Erler: -73 keli, -81 keli
18 maýsym
Jarystyń bastalýy – 10:00
Fınaldyq beldesýler – 17:00
Áıelder: -78 keli, +78 keli
Erler: -90 kg, -100 kg, +100 kg