Is-qımyldarynyń biryńǵaı tujyrymyn ázirleý úshin qajet.
Qazaqstan áskerıleri arnaıy ótip jatqan oqý-jattyǵý aıasynda memlekettik shekarany birlesip kúzetý máselelerin pysyqtady, dep habarlaıdy Almaty-akshamy.kz.
««Batyl toıtarys – 2022» keshendi vedomstvoaralyq strategıalyq komandalyq-shtabtyq oqý-jattyǵýy aıasynda Qorǵanys mınıstrliginiń quramalary men bólimderiniń áskerı qyzmetshileri memlekettik shekara kúzetin kúsheıtý tapsyrmalaryn oryndady», - delingen Qorǵanys mınıstrliginiń baspasóz qyzmetiniń habarlamasynda.
Oqý-jattyǵýdyń bastalǵany jóninde dabyldy qabyldap alǵan «Ońtústik», «Batys» óńirlik qolbasshylyqtary men Desanttyq-shabýyldaý áskerleriniń bólimsheleri Almaty, Jambyl, Qyzylorda, Mańǵystaý jáne Túrkistan oblystarynyń shekara mańyndaǵy aýdandaryna jaýyngerlik tehnıkamen marsh jasap, UQK Shekara qyzmetiniń óńirlik bólimsheleriniń jedel baǵynysyna ótti.
- «Batyl toıtarys – 2022» strategıalyq oqý-jattyǵýyn ótkizý kezeńinde Qorǵanys mınıstrligimen birlesip, Qazaqstan Respýblıkasynyń Memlekettik shekarasyn kúzetý máseleleri pysyqtaldy, – dep túsindirip ótti Jambyl oblysy Merki aýdany boıynsha shekara basqarmasynyń bólim bastyǵy podpolkovnık Baqytjan Aısaǵalıev. – Osy sharalardyń bári memlekettik shekarany birlesip qorǵaý is-qımyldarynyń biryńǵaı tujyrymyn ázirleý úshin qajet.
Oqý-jaýyngerlik tapsyrmalardy oryndaý barysynda Qarýly Kúshter men Shekara qyzmetiniń áskerı qyzmetshileri narádtar quramynda kezekshilik atqaryp, tosqaýyl beketterin ornatty jáne baqylaý-izdestirý jumystaryn júrgizdi.
Bólimshe komandırleri qarýly jáne qarýsyz arandatýlarǵa jedel den qoıý, shekaradan jekeleı jáne toptasyp ótý amaldarynyń jolyn kesý, sondaı-aq zańsyz qarýlanǵan quramalardyń kózin joıý sıaqty birlesken is-qımyldardy uıymdastyryp, is júzinde mashyqtandy.
«Batyl toıtarys – 2022» oqý-jattyǵý sheńberinde memlekettik shekarany kúzetýdi kúsheıtý sharalary - Memleket basshysynyń kúshtik qurylymdardy tıimdi úılestirýdi qamtamasyz etý, olardyń jedel jáne áskerı-tehnıkalyq úılesimdiligin jolǵa qoıý jónindegi tapsyrmalaryn iske asyrý baǵdarlamasynyń bir bóligi.