Respýblıkalyq búdjetten 6 mlrd teńgeden astam qarajat bólindi.
«Ańsaǵan sábı» baǵdarlamasy aıasynda 1 myńnan astam sábı dúnıege kelgen. Bul jaıynda Shymkenttegi bedeýlik problemalaryna arnalǵan halyqaralyq konferensıada Densaýlyq saqtaý mınıstri Ajar Ǵınıat aıtty, dep habarlaıdy Almaty-akshamy.kz QazAqparatqa silteme jasap.
Mınıstrdiń aıtýynsha, elimizde joǵary tehnologıalyq kómektiń qoljetimdiligin qamtamasyz etýde EKU baǵdarlamalaryn memlekettik qarjylandyrý mańyzdy ról atqardy.
2010 jyldan beri 9 myńǵa jýyq baǵdarlama ótkizildi, 3 myńnan astam bala dúnıege kelgen.
«Balalardyń bolmaýyna baılanysty neke buzylatyn jaǵdaılar týyndaıdy. 2020 jyldyń 1 qyrkúıeginde Memleket basshysy Úkimetke EKU-ǵa kvotany 7 ese ulǵaıta otyryp, «Ańsaǵan sábı» arnaıy baǵdarlamasyn iske qosýdy tapsyrdy, oǵan respýblıkalyq búdjetten 6 mlrd teńgeden astam qarajat bólindi. Onyń aıasynda 3 myńnan astam áıel júkti bolyp, 1 myńnan astam bala dúnıege keldi», - dep atap ótti Ajar Ǵınıat.
Eske sala keteıik, buǵan deıin Ajar Ǵınıat bedeýlikti emdep qana qoımaı, sebepterimen kúresý qajettigin aıtqan bolatyn.