Jambyl oblysynda áskerı bólimdegi jarylys saldarynan oqıǵa ornyna taqaý ornalasqan úsh eldi mekenniń turǵyndary evakýasıalandy, dep habarlaıdy almaty-akshamy.kz
Jambyl oblysynyń Baızaq aýdanyna qarasty Qaınar aýylynda ornalasqan QR Qorǵanys mınıstrliginiń №28349 áskerı bóliminde (ınjenerlik-saperlik brıgada) oq-dári qoımasynan órt shyqqany týraly habarlama saǵat 19:10-da túsken. Al 250 turǵyny bar Qaınar aýyly oqıǵa ornynan 1 shaqyrym da bolmaıtyn qashyqtyqta ornalasqan. Turǵyndar evakýasıalanǵan.
Uzyndyǵy 41 metr, eni 17 metrlik oq-dári qoımasy órtenip jatyr. Qoımada eki úlken jarylys bolǵan. Oblystyq TJD-nyń bir qyzmetkeriniń jaraqattanǵany týraly aqparat bar.
Dabyl belgisimen oblystyq polısıa departamentiniń jeke quramy (300 adam) jáne 5513 áskerı bóliminiń jeke quramy (520 adam) qaýipsizdikti saqtaý jumystaryna jumyldyryldy.
Oqıǵa ornyna jedel járdem brıgadasynyń jáne oblystyq tótenshe jaǵdaılar departamentiniń 30 toby jiberildi. Apat bolǵan jerge baratyn barlyq joldar, onyń ishinde temirjol ýaqytsha jabyldy. Jaqyn mańdaǵy Bazarbaı, Úsh-Bulaq, Jańaturmys aýyldarynyń turǵyndary qaýipsiz aımaqqa kóshirilýde. Qoǵamdyq tártipti qorǵaý jáne tonaýdyń aldyn alý maqsatynda evakýasıalanǵan eldi mekenderdi patrúldeý uıymdastyryldy.
Baızaq aýdanynda jedel shtab quryldy, ony oblys ákimi B.Saparbaev basqarýda.
«Almaty-Taraz» joldaryn oblystyń jol polısıasynyń 3 ekıpajy, «Taraz-Almaty» 5 ekıpajy ýaqytsha jaýyp tastady.
Taraz qalasynyń N1 qalalyq aýrýhanasyna túrli jaraqatpen 32 adam tústi.