Elimizdiń Bilim jáne ǵylym mınıstri Bilim kúnimen quttyqtaýyn jetkizdi
QR Bilim jáne ǵylym mınıstri Asqat Aımaǵambetov qazaqstandyqtardy Bilim kúnimen quttyqtady, dep habarlaıdy Almaty-akshamy.kz.
Qurmetti ustazdar, oqytýshylar, oqýshylar, stýdentter jáne ata-analar!
Sizderdi 1 qyrkúıek — jańa oqý jylynyń bastalýymen quttyqtaımyn! Bilim berý uıymdarynda oqý jyly qatań sanıtarlyq talaptardy saqtaı otyryp, dástúrli formatta bastalady.
Balalar óz mektepterin, dostary men synyptastaryn, al muǵalimderimiz oqýshylaryn saǵyndy. Barlyǵy mektepterdiń ashylýyn asyǵa kútti.
Álemdik pandemıa bilim berý úrdisindegi muǵalimniń baǵa jetpes rólin aıqyndaı tústi. Atap aıtsaq, muǵalimniń kásibıligi, tájirıbesi, balaǵa degen súıispenshiligi men oqýshynyń ómirindegi atqaratyn róli aıqyndaldy. Álbette, muǵalimder gadjet ekrandary arqyly emes, balalarmen tikeleı baılanysta bola otyryp beretin bilimdi zamanaýı tehnologıalarmen salystyrý qıyn.
1 qyrkúıek — birinshi synyp oqýshylary úshin erekshe mereke. Bıyl 394 myńǵa jýyq bala mektep tabaldyryǵyn alǵash ret attaıdy. Osy saltanatty kúni «Álippe» men «Býkvar» oqýlyqtaryn qoldaryna alatyn birinshi synyp oqýshylaryn quttyqtaǵym keledi. Búldirshinderimizge myqty densaýlyq tilep, ashyq jáne bilimqumar bolýǵa shaqyramyn.
Jańa oqý jyly árbir oqýshy, stýdent, muǵalim jáne oqytýshy, jalpy, bilim berý salasyna qatysy bar árbir adam úshin qyzyqty ári paıdaly bolýyn tileımin.
Qurmetti áriptester! Kópten kútken dástúrli formatqa oralyp, mektep qabyrǵasynda balalardyń jarqyn kúlkilerin estý sizderdi qýanyshqa bóleıtinin bilemin. Joǵary oqý oryndaryndaǵy aýdıtorıalar da qyzyqty áńgimeler men zıatkerlik pikirtalastarǵa toly bolary sózsiz.
Qymbatty bilim alýshylar, muǵalimder men ata-analar! Sizderdi Bilim kúnimen quttyqtaı otyryp, barshańyzǵa myqty densaýlyq tileımin!