Joba shamamen 150 myń balany qamtymaq
Art Sport baǵdarlamasyna ótinimder qabyldaıtyn ınternet-platforma júıeli jumys júrgizýge jaramsyz. Osynyń kesirinen jan basyna shaqqandaǵy qarjylandyrý baǵdarlamasyn júzege asyrý kezinde ákimdik kúrdeli problemalarǵa tap bolǵan. Atyshýly joba týraly búgin Almaty ákiminiń orynbasary Arman Qyryqbaev arnaıy suhbat berip, qarjylandyrý nelikten toqtaǵanyn túsindirdi, dep habarlaıdy Almaty-akshamy.kz Almaty.tv-ge silteme jasap.
Qala ákiminiń orynbasary Arman Qyryqbaev BAQ ókilderiniń basyn qosyp, áıgili Art Sport baǵdarlamasy tóńiregindegi máseleni túsindirdi. Qyrkúıek bolsa jaqyndady, al jobany qarjylandyrýdy ákimdik qyrkúıekte toqtatatynyn habarlaǵan bolatyn. «Ákim ózge óńirlerge qaraǵanda Almaty aqsha bólý merzimin barynsha uzartyp, barlyq mindettemeni laıyqty oryndady» deı kele, jumystyń toqtaýyna Art Sport platformasyndaǵy olqylyqtar sebep bolǵanyn atap ótti.
«Art Sport platformasy memlekettik, resmı aqparat bazalaryna kiriktirilmeı, ómirde joq adamdardy qabyldaýǵa jol bergen. Iaǵnı, kez kelgen adam, kez kelgen esimmen ózin aıqyndaıtyn qujatsyz op-ońaı tirkele beredi. Platformada kezekke qoıý júıesi joq. Sondaı-aq balaǵa jaýapty ókil elektrondy sandyq qoltańbasyz aı saıynǵy tabeldi rastaı beredi. Al tabeldiń shynaıy toltyrylǵanyn bilip, tekseretin tetik qarastyrylmaǵan», – dedi Almaty qalasy ákiminiń orynbasary Arman Qyryqbaev.
Platforma azamattardyń derbes derekterin saqtaý maqsatynda tıisti sertıfıkatqa ıe bolýy tıis. Sondaı-aq derekterdi óńdeýge kelisim alýǵa múmkindik beretin «Smart Bridge» servısine qosylýy kerek eken. Art Sport júıesi bul talaptardy da saqtamaǵan. Osy sıaqty ózge de kemshin tustary jetip artylatyn kórinedi. Basy men aıaǵy joq júıeniń kesiri qala qazynasyna qatty zıan keltirip, bıylǵa bólingen aqshadan bólek Mádenıet basqarmasy 194 mln teńge qaryz ekeni anyqtalypty.
«Jańa vaýcher berýdi toqtatqannyń ózinde jyldyń basynan beri 11 mlrd teńgedeı qarjy tólendi. Eger osylaı kózimizdi jumyp otyra bersek, onda jyl sońyna deıin taǵy 9 mlrd teńge bólýge májbúr bolamyz», – dedi Almaty qalasy ákiminiń orynbasary Arman Qyryqbaev.
Degenmen baǵdarlama túbegeıli toqtap qalmaıdy. Ákimdik qazir jobany óz aldyna jekeleı qarastyryp, qaıtadan jasaýdy qolǵa alǵan. Biraq ol tek muqtaj, múmkindigi shekteýli balalary bar, kópbalaly otbasyna, ata-anasyz qalǵan balalarǵa arnalady. Baǵdarlama úshin arnaıy aqparattyq júıe qaıta iske qosylady. Onda eń bastysy aqparattyq qaýipsizdik saqtaýǵa erekshe mán berilmek.
«Elimizde derbes derekter týraly zań bar. Balaǵa qatysty bolsa, tipti, jaýapkershilik artady. Erteń júıe arqyly jeke derek shyǵyp ketse, eń aldymen ata-analarǵa zıanyn tıgizedi. Sondyqtan bul iske muqıat qaraýymyz kerek», – dedi Sıfrlandyrý basqarmasynyń basshysy Baıan Qońyrbaev.
Joba shamamen 150 myń balany qamtıdy dep kútilip otyr. Ony eki aıda jasaý kózdelipti. Jańa baǵdarlamanyń talaptaryna sáıkes keletin otbasylar endi jańa júıege qaıtadan ótinim berýleri kerek. Aıta ketsek, Art Sport aıasynda qalada bıyl 80 myń bala tegin seksıa men úıirmelerge qatysqan.