"ArselorMıttal Temirtaý" kompanıasy qaraǵandylyq kásiporynǵa 2 mlrd 610 mln teńge qaryz.
Nátıjesinde fabrıkanyń qyzmeti toqtap, 200-ge jýyq adam jumyssyz qaldy, dep habarlaıdy Almaty-akshamy.kz.
"Maıqudyq QQ "SÚ" - 2022 jyly óńir boıynsha "Senimdi salyq tóleýshi" jáne "Senimdi óndirýshi” nomınasıalary boıynsha úzdik dep tanylǵan kompanıa. Kompanıa qurylymynda jer qoınaýyn paıdalanýshy ózge de kásipkerlik sýbektileri bar.
2022 jylǵy 17 tamyzda "Maıqudyq QQ "SÚ" JSHS men "ArselorMıttal Temirtaý" AQ arasynda №4600025567 kelisimshart jasaldy.
2022-2023 jj. "KAZ Ferrıt" JSHS óndirilgen kómir konsentratyn “Arselorǵa” osy kelisimshart sheńberinde jóneltip otyrdy. “AMT” AQ tarapynan konsentrattyń sapasy, jetkizý merzimi nemese sharttyń basqa talaptary boıynsha birde bir eskertý bolǵan joq. Kelisimshart 2023 jyldyń 31 jeltoqsanyna deıin jasalǵanyna qaramastan, “AMT” AQ konsentrant alýdy maýsym aıynan bastap eshqandaı túsindirýsiz toqtatty.
Bul jaǵdaı "KAZ Ferrıt" fabrıkasynyń qyzmetin toqtatýǵa, salyq aýdarymdaryn keshiktirýge, jumyssyzdyqqa alyp keldi. (Kásiporynda "Samuryq Qazyna Invest" JSHS arqyly memlekettiń de úlesi bar).
“ArselorMıttal Temirtaý” AQ qazir shetelden kómir konsentratyn satyp alyp otyr. Al joǵary sapaly jáne qajetti kólemde ónim shyǵaratyn otandyq zaýyt jabylǵaly tur.
Sondaı-aq, “ArselorMıttalTemirtaý” kompanıasy 33 tonna konsentratty satyp alǵany úshin 2 mlrd 610 mln teńge qaryz.
"Aǵymdaǵy jyldyń shilde aıynan bastap kásiporyn óz qyzmetin toqtatýǵa májbúr boldy. Barlyq ujym aqysyz eńbek demalysyna jiberildi. Zaýyttyń jabylýy eki júzden astam jumysker men olardyń otbasylarynyń materıaldyq ál - aýqatyna keri áserin tıgizedi, kóptegen jumysshylardyń nesıeleri bar", - deıdi "Kaz Ferrıt" JSHS dırektory Kópbaev Bekjan Ómirbekuly.
"AMT” AQ taýar jetkizilgen kúnnen bastap 25 kúntizbelik kún ishinde tólem júrgizýge mindetti. Merzimi ótken bereshek týraly júıeli túrde hattar jiberildi. Bereshekti erikti túrde óteýden bas tartqan jaǵdaıda, sotqa talap-aryzben júginetinimiz týraly hat joldadyq", - deıdi "Maıqudyq QQ" SÚ " JSHS dırektory Dýlat Nurǵalıuly Nurǵalıev.
"Ónerkásiptik saıasat týraly" Zańǵa sáıkes, memlekettiń yntalandyrý sharalarynyń biri ishki naryqty qoldaý, otandyq óndiristi damytý bolyp tabylady.
Kásiporyn ujymy memleket bul jaǵdaıǵa shuǵyl aralasýy tıis dep esepteıdi. "ArselorMıttal Temirtaý" AQ qazaqstandyq qamtý týraly normalardy oryndap, otandyq óndirýshilerdi qoldaýy tıis.