Almatynyń segiz kóshesinde jasyl býferlik aımaqtar paıda bolady
Almaly aýdanynda birden segiz kóshede býferlik aımaqtardy aýqymdy kógaldandyrý jumystary bastaldy, - dep habarlaıdy Aqshamnews.kz.
Býferlik aımaq – bul jol, trotýar nemese turǵyn úıler men shýly nysandar arasyndaǵy keńistik. Jasyl jelekti otyrǵyzý shýdyń deńgeıin tómendetip, shańdy ustap qalýǵa, aýany tazartýǵa, qalalyq ortany turǵyndar úshin jaıly etýge septigin tıgizedi.
Jol jıegin kógaldandyrý josparyna Naýryzbaı batyr, Shevchenko jáne Qurmanǵazy kósheleriniń jekelegen aýmaqtary kirdi. Jeltoqsan, Abylaı han dańǵyly, Nazarbaev jáne Seıfýllın syndy qalǵan tórt kóshede abattandyrý jumystary aýdan aýmaǵyndaǵy búkil uzyndyq boıymen júrgiziledi. Sondaı-aq, josparǵa Abaı dańǵylynyń bir bóligi de (Nazarbaev dańǵylynan Esentaı ózenine deıin) endi. Barlyǵy 60 myńnan astam buta otyrǵyzylady.
Keıbir ýchaskede – Shevchenko, Qurmanǵazy jáne Naýryzbaı batyr kóshelerinde abattandyrý jumystary aıaqtaldy. Tamyz aıynda Abaı, Abylaı han dańǵyly men Jeltoqsan kóshesinde jumys bastalyp, 16 myńnan astam buta otyrǵyzyldy. Jobany qazan aıynyń sońyna deıin aıaqtaý josparlanǵan.
Kógaldandyrý úshin kópirshik, sur tobylǵy, aq sántal, kókjalbyz syndy qala jaǵdaıyna tózimdi ósimdikter tańdaldy. Ásirese, kútimdi qajet etpeıtin ári almatylyqtardyń súıikti gúli Rýgoza raýshanyna mán berilip otyr.
Abattandyrylǵan ýchaskelerde avtomatty sýarý júıesi iske qosyldy. Jańa jasyl aımaqtar aýdandy kórkeıtip, aýany tazartyp, kóshelerdiń tynysh ári jaıly bolýyna yqpal etedi.