Operasıa shamamen bes saǵatqa sozyldy
Almatyda №2 balalar klınıkalyq aýrýhanasynda alǵash ret qol saýsaǵyn replantasıalaý boıynsha kúrdeli operasıa jasaldy, dep habarlaıdy Almaty-akshamy.kz aýrýhananyń baspasóz qyzmetine silteme jasap.
Almatyda alǵash ret saýsaqty replantasıalaý boıynsha kúrdeli operasıa ótti.
9 jastaǵy balanyń kóshede alǵan jaraqattan saýsaǵy bólinip qalǵan. Dárigerler tolyqtaı bólinip qalǵan 5-shi saýsaqty qaıta jalǵap, aman alyp qaldy.
«Shuǵyl operasıany travmatologıa bóliminiń meńgerýshisi Sadyrbalın Erlan, mıkrohırýrgter Kosarev Sergeı jáne Smolánkın Aleksandr birge jasady. Saýsaqty qutqarý múmkindigi óte az boldy. Eki profıldi mamannyń bir ýaqytta qatysýy, olardyń jedel jáne úılesimdi jumysynyń arqasynda úzilgen saýsaqty qalpyna keltirý boıynsha eń kúrdeli operasıa sátti ótti. Mundaı operasıany Qazaqstanda sanaýly mamandar ǵana jasaı alady. Bizdiń dárigerlerdiń biregeı tájirıbesi men biliktiligi bar», - dep atap ótti emdeý mekemesiniń baspasóz qyzmeti.
Operasıa shamamen 5 saǵatqa sozyldy.
Dárigerler saýsaqty saqtap qalý úshin qoldan kelgenniń bárin jasap, tin men tamyrlardy operasıalyq mıkroskoppen tigip, zaqymdalǵan saýsaqtyń arterıalaryn, óte kishkentaı dıametrli júıke talshyqtaryn biriktirgen.
Jalǵanǵan saýsaqta súıekten basqa sińirler, tamyrlar jáne qan aınalymy qalpyna keltirildi.
«Mundaı operasıany jasaý úshin zamanaýı mıkrohırýrgıalyq tehnıka qajet: mıkroskop, mıkrohırýrgıalyq quraldar jáne óte juqa tigis materıaly qajet, ony jaı kózben kórý qıyn, munyń bári bizde 2-shi balalar aýrýhanasynda bar. Bizge dıametri 1,2 mıllımetr bolatyn tamyrlardy tigýge týra keldi. Mundaı operasıany tıisti daıyndyqsyz, jabdyqsyz, quralsyz jáne shyǵyn materıaldarynsyz júrgizý múmkin emes», - dedi №2 BQKA travmatologıa bóliminiń meńgerýshisi Erlan Sadyrbalın.
Kásibı replantasıa yqtımal táýekelderdi boldyrmaýǵa, qoldyń zaqymdalǵan bóliginiń qozǵalǵyshtyǵyn, sezimtaldyǵyn qalpyna keltirýge múmkindik bergen.
Jalǵanǵan saýsaq tolyǵymen tamyr alyp, qalypty jaǵdaıda jumys istep tur.
9 jasar bala segiz kún stasıonarlyq em qabyldady.