Qarajat jergilikti búdjetten bólingen.
Almaty qalasynyń máslıhaty «Almaty Business-2025» óńirlik baǵdarlamasyna 2022 jylǵy qańtardaǵy jappaı tártipsizdikter barysynda zardap shekken shaǵyn jáne orta bıznes sýbektileri úshin jańa nesıelik ónim engizý bóliginde ózgeristerdi bekitti. Jeńildikti nesıeleý 12 aıǵa deıingi merzimge jyldyq 2%-ben 10 mln teńgege deıin aınalym qarajatyn tolyqtyrý úshin qarastyrylǵan. Qaryz kepilge nemese «Almaty» ÁKK» AQ ishinara kepildigimen beriledi, dep habarlaıdy Almaty-akshamy.kz.
Qarajat jergilikti búdjetten bólingen, baǵdarlama operatory «Almaty» MQU» JSHS bolyp tabylady. Kásipkerlerge ótinim berý úshin myna mekenjaıǵa habarlasý qajet: Almaty q., Baızaqov kóshesi 303, kab 201, Almaty MQU keńsesi, anyqtama telefony 2810 (uıaly telefonnan tegin), +7 727 356 02 80 (qalalyq nómirlerden).
Buryndary HÁOT sanatyndaǵy (halyqtyń áleýmettik osal toptary) tulǵalarǵa jáne óndiristik parkterdiń rezıdentterine «Almaty Business-2025» baǵdarlamasy aıasynda jyldyq 2%-ben jeńildetilgen nesıege qarastyrylǵan bolatyn.
Sonymen qatar, Almatyda zardap shekken SHOB sýbektileri komýnaldyq shyǵyndardan 3 aıǵa, qalanyń komýnaldyq menshigin jalǵa alýshylar 6 aıǵa jaldaý aqysynan bosatyldy. Qosymsha, «Almaty Finance» JSHS jáne «Almaty» MQU» JSHS-da olarǵa negizgi qaryzdy óteý boıynsha merzim keıinge qaldyryldy, 180 kúnge deıingi merzimge nesıelik mindettemeler boıynsha aıyppuldar men ósimpuldar joıyldy.